کراچی(مانیٹرنگ ڈیسک، این این آئی) سندھ کے وزیر اطلاعات ناصر شاہ نے وفاقی وزیر اطلاعات فواد چوہدری کی اردو میں غلطیاں نکال دیں۔نجی ٹی وی کے مطابق وفاقی وزیر اطلاعات فواد چوہدری نے سندھ حکومت کے لاک ڈائون کے فیصلے پر اعتراض کیا اور اردو میں ٹوئٹر پر بیان جاری کیا۔وفاقی وزیر اطلاعات کے اعتراض پر ناصر شاہ نے

لاک ڈائون سے متعلق کوئی جواب نہیں دیا البتہ انہوں نے فواد چوہدری کو اردو کی غلطیاں گنوائیں۔ناصر شاہ نے وفاقی وزیر کی ٹوئٹس میں اردو کی غلطیاں نکالتے ہوئے کہا کہ آپ لاک ڈائون کا جائزہ لیں، ہم آپ کی صلاحیتوں کا جائزہ لے رہے ہیں۔دریں اثنا صوبائی وزیر اطلاعات و بلدیات سندھ سید ناصر حسین شاہ نے کہا ہے کہ اعلی عدالتوں کے ججوں کی اہلیت پر فواد چودہری کے ریمارکس کی میں شدید مذمت کرتا ہوں۔ ان کے ریمارکس عقل سے عاری ہیں ، جب ججوں کے طرزِ عمل یا اہلیت پر پارلیمنٹ میں بات نہیں کی جاسکتی ہے تو کوئی وفاقی وزیر یہ کیسے بیان دے سکتا ہے کہ جج نااہل ہے؟ اب جب ان کے ریمارکس نے معزز ججوں کو بدنام کیا ہے تو ضروری ہے کہ مجھے اس پر بات کرنا ہوگی کہ ہمارے پاس سندھ ہائی کورٹ کے محترم چیف جسٹس کے لئے انتہائی احترام ہے جو نہ صرف سینئر ترین ہیں بلکہ ایک بہت ہی قابل جج ہیں ، نہ صرف وہ بلکہ چاروں جج انتہائی قابل ہیں اور ان کی صلاحیت ، دیانتداری یا قابلیت کے بارے

میں کوئی شبہ یا سوال نہیں ہے ، یہ انتہائی بدقسمتی کی بات ہے کہ تحریک انصاف ججوں کو بدنام کرنے کے مشن پر ہے۔ یہ عدلیہ جیسے محترم ادارے کے لیے تباہ کن ہے۔ کیوں کہ عدلیہ ایک ستون ہے جس کے بغیر ریاست کھڑی نہیں ہوسکتی ہے۔چیف جسٹس سندھ ہائی کورٹ سینئر ترین اور انتہائی قابل بھی ہیں۔ اس کے علاوہ عدالت ِعالیہ میں فیصل عرب

کی ریٹائرمنٹ کے بعد کوئی بھی سندھی بولنے والا جج موجود نہیں ہے۔ چیف جسٹس بلوچستان کی طرح ، جو ایک بلوچی ہیں ، ان کو بھی اعلی عدلیہ میں ترقی دی گئی ہے ، ہم توقع کرتے ہیں کہ چیف جسٹس سندھ بھی اعلی عدلیہ میں ترقی پائیں گے۔ اس بات پر توجہ دلانے کا ہر گز مقصد یہ نہیں کہ لسانیت پر بات کی جارہی ہے بلکہ ایک حق دار کو اس کا حق دلانے کی بات کی جارہی ہے جو بحیثیت مسلمان ہمارا فرض اولین ہے۔

واضع نہیں ہوتا واضح ہوتا ہے ، سندہ نہیں ہوتا سندھ ہوتا ہے ۔۔ آپ لاک ڈاؤن کا جائزہ لیں ہم آپ کی صلاحیتوں کا جائزہ لیتے ہیں ۔ شکریہ https://t.co/Chjjjck1mL

— Syed Nasir Hussain Shah (@SyedNasirHShah) July 30, 2021

موضوعات:فواد چوہدری ناصر شاہ