لاہور (آن لائن) ترجمان محکمہ اوقاف پنجاب نے کہا ہے کہ وزیر اعلیٰ پنجاب کی ہدایت پرحکومت پنجاب نے تمام درباروں میں واقع کار و سائیکل پارکنگ،بیت الخلاء اورحفاظت پاپوش کی سہولیات کو بلا معاوضہ فعال کرتے ہوئے اس کی فر اہمی کو یقینی بنانے کیلئے اقدامات کا آغاز کر دیا ہے۔اس سلسلہ میںفوری طور پرچیف ایڈمنسٹریٹر وقف پنجاب نے میڈیکل سپرنٹنڈنٹ

داتا دربار ہسپتال اور جملہ زونل ناظمین اوقاف پنجاب کو احکامات صادر کرتے ہوئے مراسلہ میں کہا ہے کہ اوقاف کے زیر انتظام تمام مزارات، مساجد و ہسپتال میں عوام کیلئے کا ر و سائیکل پارکنگ کی سہولیات کو بلا معاوضہ کر دیا گیا ہے۔تمام جملہ زونل ناظمین اوقاف پنجاب اور میڈیکل سپرنٹنڈنٹ کو پابند کیا گیا ہے کہ وہ اس سلسلہ میں فوری طور پر مناسب جگہوں پرفری پارکنگ کے بینرز و بورڈ آویزا ں کریں ۔پارکنگ کی مختص شدہ جگہوں پر لائن مارکنگ اور روزانہ کی بنیاد پر صفائی کو یقینی بنائیں جبکہ نگرانی کیلئے سکیورٹی گارڈز اور سکیورٹی کیمرہ کے سخت انتظامات کئے جائیں۔مراسلہ میں مزید کہا گیا ہے کہ اوقاف کے زیر انتظام مزارات اور مساجد پر بیت الخلا کی سہولیات فوری طور پر بلا معاضہ کی جارہی ہیں۔ جن مزارات و مساجد میں صفائی کا ٹینڈر دیا گیا کو پابند کیاگیا کہ وہ واش رومز کی صفائی کی بھی ذمہ دار ہو نگی۔دیگر اوقاف اہلکاران جن کی ڈیوٹیاں مزارات و مساجد میں ہیںکو صفائی کرنے بارے پابند کر دیا گیا ہے ۔محکمہ اوقاف کی طرف سے واضع ہدایت دی گئی ہے کہ بیت ا لخلا کی اعلیٰ معیار کی صفائی کو یقینی بنایا جائے گا۔صفائی کے عمل میںبہترین کیمیکل،کلورین یا ڈیٹول کا استعمال کیا جائے۔بیت الخلاء بلاک کے تمام واش بیسن پر ہاتھوں کی صفائی کے لئے صابن کی لازمی موجودگی ہو گی۔بیت الخلا ء بلاک کی تمام ٹوٹیاں، لائٹس اور دروازے درست حالت میں ہونگے۔

فرش پر پھسلن سے بچائو کے لئے وائپر کا استعمال متواتر اور لازمی کیا جائے گا۔چیف ایڈمنسٹریٹر وقف پنجاب نے اپنے مراسلہ میں مزید پابند کرتے ہوئے کہا ہے کہ تمام مزارات اور مساجد پر پاپوش کی حفاظت کی سہولیات کو فری کر دیا گیا ہے۔زائرین کے پاپوش کی حفاظت کیلئے ریک بنائے جا رہے ہیں ۔ ہر ریک پر سیریل نمبر تحریرہوگا۔ پاپوش کے حفاظت کی جگہ کی صفائی کو یقینی بنایا جائے گا ۔حفاظت پا پوش کیلئے مختص شدہ

جگہ کی نشاندہی کیلئے دربار و مساجد کے اطراف میں فلیکسز آویزاں کئے جارہے ہیں۔اس دوران سکیورٹی گارڈز اور سکیورٹی کیمرہ کے سخت انتظامات عمل میں لائے جائیںگے۔ اس سلسلہ میںشکایات کے ازالہ کیلئے انتظامیہ اورمنیجر کے موبائل نمبرز پر مشتمل فلیکسز بھی آویزاں کی جائیں۔ محکمہ اوقاف کی طرف سے فیصلہ کیا گیا ہے کہ درج بالا امور کے لئے محکمانہ بجٹ میں کوئی بھی یو میہ اجرت ملازم بھرتی اور تعینات نہیں کیا جائے گا۔

موضوعات:محکمہ اوقاف