اسلام آباد(مانیٹرنگ +این این آئی) پارلیمنٹ ہاؤس کے باہر تحریک انصاف کے کارکنان نے لیگی رہنماؤں شاہد خاقان عباسی اور مصدق ملک کو دھکے دیئے، گربیان بھی پکڑلیا۔ ہاتھا پائی کی سوشل میڈیا پر مختلف ویڈیوز سامنے آ رہی ہیں، مصدق ملک پر حملے کی ویڈیو بھی منظر عام پر آ گئی ہے۔ ویڈیو میں لیگی رہنما مصدق ملک
پی ٹی آئی کارکنوں کے درمیان شدید دھکم پیل کا شکار نظر آئے اس دوران پی ٹی آئی کے ایک کارکن نے ان کو پیچھے سے تھپڑ بھی مارا، جس پر شاہد خاقان عباسی فوراً اس شخص کی جانب لپکے اسی دوران مصدق ملک بھی مڑ کر اس شخص کو مارنے کے لئے اس کے پیچھے دوڑے لیکن پی ٹی آئی کارکن بھاگنے میں کامیاب ہو گیا۔ واضح رہے کہ ہفتہ کو (ن)لیگی رہنماؤں شاہد خاقان عباسی، احسن اقبال، مریم اور نگزیب، مصدق ملک و دیگر رہنماؤں کی پریس کانفرنس کے دوران تحریک انصاف کے کارکنان کی بڑی تعداد ریڈ زون میں گھس گئی۔پی ٹی آئی کارکنان نے پلے کارڈز اٹھا رکھے تھے جس میں وزیراعظم عمران خان کے حق میں اور (ن) لیگ کے رہنماؤں کے خلاف نعرے درج تھے تاہم صورتحال اس وقت کشیدہ ہوگئی جب تحریک انصاف کے کارکنان نے پارلیمنٹ ہاؤس جانے والے (ن) لیگی رہنماؤں کا گھیراؤ کرلیا، اس دوران ہاتھا پائی بھی ہوئی اور کارکنان نے شاہد خاقان عباسی کو دھکے دیئے جب کہ ردعمل پر مصدق ملک کا گریبان بھی پکڑا گیا، پی ٹی آئی کارکنان نے احسن اقبال کو جوتا دے مارا۔پی ٹی آئی کارکنان پارلیمنٹ ہاؤس کے قریب جانے کیلئے نعررے بازی کرتے رہے، پی ٹی آئی کارکنان کی مولانا فضل الرحمان کے خلاف بھی نعرے بازی کی۔کشیدہ صورتحال کے باعث پولیس کو دخل اندازی کرنی پڑی اور پولیس نے تحریک انصاف کے کارکنان کو لیگی رہنماؤں سے دور کیا۔ جس کے بعد لیگی رہنماؤں نے دوبارہ پریس کانفرنس کی اور پی ٹی آئی قیادت اور وزیراعظم نے اس واقعہ کی تحقیقات کا مطالبہ کیا۔
