اسلام آباد (این این آئی)پاکستان تحریک انصاف کے مرکزی سیکرٹری اطلاعات عمر چیمہ نے حزب اختلاف کی اے پی سی پر رد عمل کا اظہار کرتے ہوئے کہا ہے کہ 25 جولائی 2018پاکستان کی سیاسی تاریخ میں حقیقی جمہوریت کے آغاز کے دن کے طور پر یاد رکھا جائیگا۔ ایک بیان میں عمر چیمہ نے کہاکہ یہ وہ دن تھا جب پاکستانی قوم نے کرپٹ اور نااہل سول آمروں کو اقتدار سے الگ کیا۔ انہوں نے کہاکہ 25 جولائی ہمیشہ’’ یوم جمہوریت ‘‘کے عنوان سے یاد رکھا

جائے گا، اپوزیشن کو عوام کا احساس ہوتاتو آج اجتماعی طور پر قوم سے اپنی لوٹ مار اور ناکام پالیسیوں پر معافی مانگتی۔ انہوں نے کہاکہ موجودہ معاشی تباہی ان کی چوری اور کرپشن کا نتیجہ ہے۔ انہوںنے کہاکہ سارے مل کر بھی معیشت کی بحالی کے لئے حکومت کو کوئی مثبت تجویز نہیں دے سکے۔ انہوں نے کہاکہ رونے اور واویلا کرنے سے احتساب کا عمل نہیں رکے گا، اپوزیشن لیڈر اپنی بے گناہی کے ثبوت دیں یا قوم کا لوٹا پیسہ واپس کریں۔ انہوں نے کہاکہ اب کی بار بچنا نا ممکن ہے کیونکہ قومی مجرموں کا پہلی بار بلا امتیاز احتساب ہو رہا ہے۔ انہوں نے کہاکہ آج پاکستان میں ادارے اور عدالتیں مکمل طور پر آزاد ہیں۔عمر چیمہ نے کہاکہ اس ملک میں مک مکا یا نورا کشتی کی کوئی گنجائش باقی نہیں۔