اسلام آباد (مانیٹرنگ ڈیسک)27 فروری2019 کو پاک فضائیہ کے بہادر سپوت اسکواڈرن لیڈر حسن محمود صدیقی نے بھارت کے دو طیارے مار گرائے تھے۔ان کاایک انٹرویو سوشل میڈیا پر وائرل ہو رہا ہے۔جو انہوں نے ایک نجی ٹی وی پر 2016ء میں دیا تھا۔دوران پروگرام حسن محمود صدیقی کہتے ہیں کہ ہم 24 گھنٹے تیار ہیں۔

ہم میں سے کوئی نہ کوئی 24 گھنٹے تیار رہتا ہے۔ہمارے ائیر ڈیفنس کنٹرولر سرحدوں پر نظر رکھتے ہیں۔جب کوئی دشمن اندر آنے کو سوچتا ہے تو ہمیں فوری اس کی اطلاع مل جاتی ہے اور اس سے پہلے کہ وہ ہماری سرحدوں کو عبور کرے ہم 6 منٹ کے اندر اس کے سر پر پہنچ جاتے ہیں۔انہوں نے کہا کہ جب کوئی ایسا طیارہ ہماری طرف آنے کا سوچے بھی تو ہم اس کے قریب آنے سے پہلے ہی پہنچ جاتے ہیں۔حسن محمود صدیقی نے ایف 16 اڑانے کو خوبصورت جذبہ قراردیا اور کہا کہ یہ دنیا کا ایک خوبصورت ترین جہاز ہے۔اس طیارے کو اڑانا میرے لیے فخر کی بات ہے اور ہم ان طیاروں کی بدولت ہی خطے میں بہت اوپر کھڑے ہیں۔ایف 16 کو اڑانا اور اس سے دشمن کا مقابلہ کرنا میرے لیے ایک فخر کی بات ہے۔حسن محمود صدیقی نے مزید کہا کہ ہماری ٹریننگ اتنی زبردست کی گئی ہے کہ ہم کبھی بھی دشمن کی آنکھوں میں آنکھیں ڈال کر مقابلہ کر سکتے ہیں۔ جب دشمن سے مقابلے کے لیے جاتے ہیں تو اس وقت پیدا ہونے والا جذبہ اتنا خوبصورت ہوتا ہے کہ اس کو بیان نہیں کیا جا سکتا اور دشمن سے لڑنے کا جذبہ اس وقت اللہ تعالیٰ دیتے ہیں۔یہ جذبہ دشمن کا مقابلہ کرنے اور اس پر جھپٹنے کا ہے۔

موضوعات:حسن صدیقی