لاہور(مانیٹرنگ ڈیسک) سینئر مسلم لیگی لیڈر مخدوم جاوید ہاشمی نے کہا ہے کہ اسٹبلشمنٹ اور انتظامیہ کو کہنا چاہتاہوں پاکستان کی ہڈیوں کا کچومر نہ بنایا جائے اور پاکستان میں جمہوریت کو پٹری سے نہ اتارے ‘ہم سیاسی جماعتوں سے زیادہ افواج پاکستان سے محبت کرتے ہیں ’فاٹا اور بلوچستان میں بہت زیادتیاں ہو رہی ہیں افواج پاکستان کو بھی اب فیصلہ کر نا ہوگا وہ کہاں کھڑے ہیں ۔اتوار کے روز وفاقی وزیر ریلوے خواجہ سعد رفیق کے

والد کے برسی کے موقعہ پر منعقدہ تقریب سے خطاب کر تے ہوئے مخدوم جاویدہاشمی نے کہا کہ پاکستان میں جمہوریت کے سواکوئی اور نظام نہیں چل سکتا اور جب بھی پاکستان میں کسی اور نظام کو چلانے کی کوشش کی گئی اسکے نتائج پوری قوم کے سامنے ہیں پاکستان میں جو لوگ جمہوریت اور نظام کو ختم کر نے کی باتیں کر رہے ہیں وہ ’’اْن ‘‘کی گو د میں بیٹھے ہیں مگر ہم جمہوریت کی مکمل حفاظت کر یں اور ملک میں عام انتخابات بھی اپنے مقررہ وقت پر ہی ہونے چاہیے ۔ انہوں نے کہا کہ خواجہ سعد رفیق اور ان کے بھائی خواجہ سلمان رفیق نے اپنے والد کے نام کو زندہ رکھا ہے اور ان کے نقش قدم پر چل رہے ہیں اوران کے مشن کو آگے بڑھا رہے ہیں اور وہ مشن صرف ملک میں جمہوریت کو فروغ دینا تھا ۔ خواجہ رفیق شہید آزادی کی تحریک کے نوجوان تھے ۔ ،وہ آئین ، جمہوریت اورپاکستان کے لیے شہید ہوئے ۔انہوں نے کہا کہ جب پاکستا ن وجود میں آیا تو پاکستان کے پاس کچھ بھی نہیں تھا ہم سب نے مل کر محنت کی ہے توآج ملک میں تمام اشیاء وافر مقدارمیں موجود ہیں ۔جب پاکستان وجود میں آیا تو صرف چند شہر تھے اور باقی سب گاؤں تھا اور آج پاکستان میں ترقی ہے ،اس بات کا بہت دکھ ہے کہ پاکستان کے دو ٹکڑے ہوگئے ۔ انہوں نے کہا کہ معرز عدلیہ سے درخواست ہے کہ خدا کے لیے آپ سیاسی معاملات میں مت آئیں ۔نواز شریف کے کیس میں نہ کوئی اپیل ہے اور نہ ہی کوئی وکیل ہے یہ کیسا فیصلہ ہے ۔تمام ادارے کرپشن کرتے ہیں لیکن صرف نشانے پر آتے ہیں ۔انہوں نے کہا کہ نوا ز شریف پاکستان کا واحد سیاستدان ہے جو تین مرتبہ وزیر اعظم رہا لیکن آج اپنی بیٹی کے ساتھ عدالتوں کے چکر کاٹ رہا ہے اور یہ کام صرف نواز شریف ہی کر سکتا ہے۔

موضوعات:مخدوم جاوید ہاشمی