کراچی(آئی این پی ) کراچی کے علاقے خواجہ اجمیر نگری میں پولیس مقابلے کے دوران ہلاک ہونے والا دہشت گرد پنجاب کے وزیر داخلہ مرحوم شجاع خانزادہ پر حملے کا سہولت کار نکلا۔کراچی کے علاقے نارتھ کراچی میں خواجہ اجمیر نگری کے قریب پولیس کارروائی کے دوران پولیس اور دہشت گردوں کے درمیان مقابلہ ہوا جس میں پولیس کی جوابی فائرنگ سے ایک دہشت گرد ہلاک ہوگیا۔ایس ایس پی عرفان بلوچ کے مطابق

دہشت گرد کو نارتھ کراچی میں ڈبلیو 22 کے اسٹاپ کے قریب ہلاک کیا گیا جب کہ اس دوران اس کے 2 ساتھی فرار ہوگئے۔ دہشت گرد کی شناخت سعد سرخان کے نام سے ہوئی ہے جو ہری پور کا رہنے والا تھا اور کراچی میں ڈیفنس میں رہائش پذیر تھا۔ مارا گیا دہشت گرد کالعدم پنجابی طالبان اور کالعدم لشکر جھنگوی سمیت دیگر کالعدم تنظیموں کے ساتھ کام کرتا رہا اور حال ہی میں غیر قانونی طریقے سے پاکستان پہنچا تھا۔ اسی دہشت گرد نے پنجاب کے مرحوم وزیر داخلہ شجاع خانزادہ پر حملے کے لیے خودکش جیکٹ پہنچائی تھی۔ دہشت گرد سعد سرخان ہری پور سیشن عدالت میں فائرنگ سمیت پولیس اہلکاروں کے قتل میں بھی ملوث تھا۔ پنجاب میں ایک دہشت گرد نے گرفتاری سے بچنے کے لیے خود کو دھماکے سے اڑا لیا تھا یہ اس کا ساتھی تھا اور کراچی میں پرانی سبزی منڈی کے قریب منشیات کا سب سے بڑا اڈہ چلارہا تھا۔پولیس کے مطابق دہشت گرد کے قبضے سے 4 دستی بم، 6 پستول، رائفل، 7 ایم ایم رائفل اور آوان بم بھی برآمد کیے گئے ہیں۔دوسری جانب پولیس نے رات گئے نیو کراچی میں بھی کارروائی کی جس میں ایک مشتبہ شخص کو زخمی حالت میں گرفتار کیا گیا جب کہ اس کا ایک ساتھی فرار ہوگیا۔پولیس کے مطابق زخمی شخص کے قبضے سے ایک پستول، تین رانڈز، 2 موٹر سائیکلیں اور 8 موبائل فون برآمد ہوئے ہیں۔

موضوعات:دہشتگرد