اسلام آباد (مانیٹرنگ ڈیسک) نواز شریف کی نااہلی کا خاتمہ کیسے ہو گا؟ معروف قانون دان ایس ایم ظفر کے جواب دینے سے پہلے ہی ان کی اہلیہ نے جواب دیدیا، تفصیلات کے مطابق اے آر وائی کے پروگرام آف دی ریکارڈ میں پیپلز پارٹی کے رہنما ندیم افضل چن، تحریک انصاف کے رہنما فواد چوہدری اور جسٹس (ر) ناصر اسلم زاہد شریک تھے، معروف قانون دان ایس ایم ظفر اس پروگرام میں ٹیلی فون کے ذریعے شریک ہوئے اور اپنی رائے کا اظہار کرنے لگے، اسی دوران پروگرام کے میزبان کاشف عباسی نے ایس ایم ظفر سے سوال پوچھا کہ آپ کو فیصلہ پڑھ کر یہ سمجھ نہیں آیا کہ ان کی نااہلی کتنے سال

کی ہے اور آئندہ الیکشن میں وہ کاغذات نامزدگی جمع کرائیں اور ریٹرننگ آفیسر ان کو قبول کر لے تو آپ کے خیال میں وہ نااہل نہیں رہیں گے، کاشف عباسی ابھی جواب کے منتظر تھے کہ ایس ایم ظفر کی بجائے اچانک ان کی اہلیہ کی آواز سنائی دی جو کہہ رہی تھیں کہ تم کیوں اسے بچنے کا راستہ دکھا رہے ہو۔ ان کی اہلیہ کی آواز آنے وجہ سے پروگرام میں بیٹھے تمام افراد دنگ رہ گئے اور ایسا لگا کہ کاشف عباسی نے ان کی بات سن لی ہو جنہوں نے چہرہ نیچے کرکے اپنی ہنسی کو کنٹرول کیا، جب کہ اس امر میں دلچسپ بات یہ ہے کہ ایس ایم ظفر نے پوچھے گئے سوال کا جواب دیے بغیر ہی رابطہ منقطع کر دیا۔

موضوعات:ایس ایم ظفر