اسلام آباد(آئی این پی) سپریم کورٹ آف پاکستان میں (آج) پیر سے شروع ہونے والے عدالتی ہفتے کے دوران مقدمات کی سماعت کیلئے ججز کا روسٹرم جاری، اسلام آباد میں مقدمات کی سماعت کیلئے ایک لارجر بنچ سمیت 6 جبکہ لاہور رجسٹری میں مقدمات کی سماعت کیلئے ایک بینچ تشکیل دیدیا گیا ، پانامہ کیس سے متعلق کیس کی سماعت کرنےوالا بنچ کاز لسٹ میں شامل نہیں۔ تفصیلات کے مطابق چیف جسٹس آف پاکستان میاں ثاقب

نثار نے (آج) پیر سے شروع ہونے والے عدالتی ہفتے کے دوران اسلام آباد میں مقدمات کی سماعت کیلئے ایک لارجر بنچ سمیت 6بنچز تشکیل دیدئیے جو اہم مقدمات کی سماعت کریں گے تاہم ابھی تک پانامہ کیس کی سماعت کرنے والا بنچ دوبارہ تشکیل نہیں پا سکا جو کہ کیس کا فیصلہ سنائے گا۔ لارجر بنچ جسٹس اعجاز افضل خان کی سربراہی میں جسٹس شیخ عظمت سعید ‘ جسٹس مقبول باقر ‘ جسٹس اعجاز الاحسن اور جسٹس مظہر عالم میاں خیل پر مشتمل ہو گا۔ لارجر بنچ لاہور میٹرو اورنج ٹرین منصوبے کے حوالے دسے مقدمے کی سماعت کرے گا۔ دیگر بنچوں میں بنچ نمبر ایک چیف جسٹس ثاقب نثار کی سربراہی میں جسٹس عمر عطاء بندیال اور جسٹس فیصل عرب ‘ بنچ نمبر دو جسٹس آصف سعید کھوسہ کی سربراہی میں جسٹس دوست محمد کھوسہ اور جسٹس منظور ملک ‘ بنچ نمبر تین جسٹس اعجاز افضل خان کی سربراہی میں جسٹس مقبول باقر ، جسٹس مظہر عالم میں خیل، بنچ نمبر4 جسٹس شیخ عظمت سعید اور جسٹس اعجاز الاحسن، بینچ نمبر 5جسٹس مشیر عالم کی سربراہی میں جسٹس قاضی فائز عیسیٰ، جسٹس سردار طارق مسعود پر مشتمل ہے، جبکہ جسٹس گلزار احمد خان کی سربراہی میں جسٹس سجاد علی شاہ پر مشتمل 2رکنی بینچ سپریم کورٹ لاہور رجسٹری میں مقدمات کی سماعت کریگا۔

موضوعات:پانامہ کیس