اسلام آباد(آئی این پی)دفتر خارجہ کے ترجمان نفیس ذکریا نے کہا ہے کہ کلبھوشن یادیو کے پکڑے جانے سے بھارت کا چہرہ بے نقاب ہوا ہے ، وہ تلملا اٹھا ہے،بھارت میں انتہا پسندی عروج پر ہے ، پاکستان کے ایران کے ساتھ تعلقات کشیدہ نہیں اور نہ ہی دونوں ملکو ں کے درمیان کوئی تلخی ہے ،اس حوالے سے تمام باتیں بے بنیاد ہیں،پاک ایران اعلیٰ سطحی وفود کے تبادلے جاری ہیں اوراس کی واضح مثال چند روز قبل ایرانی وزیرخارجہ کا دورہ پاکستان ہے ۔

وہ ہفتہ کو نجی ٹی وی سے گفتگوکررہے تھے جس میں انہوں نے پاکستا ن کے پڑوسی ممالک کے ساتھ تعلقات اور سرحدوں کی تازہ ترین صورتحال پر بات کی اور کہاکہ جن ممالک کے ساتھ سرحدیں ملتی ہیں تو اس میں بعض مسائل پیش آتے ہیں ۔انہوں نے کہا کہ بھارت میں انتہا پسندی عروج پر ہے وہاں پر پاکستانی مصنوعات رکھنے والے سٹور کو جلاد دیا گیا ، کلبھوشن یادیو اور احسان اللہ احسان کے پکڑنے جانے کے بعد بھارت کا چہرہ بتدریج بے نقاب ہوتا جا رہاہے اور وہ اس پر تلملا رہاہے۔ اس نے اس لئے پاکستانیوں کو ویزے دینے سے نکارکیاہے۔ نفیس زکریا نے کہا کہ بھارت نے مقبوضہ کشمیر میں بھی مظالم کی انتہا کردی ہے جس پر پوری دنیا میں ہیڈلائنز میںیہ بات کی جا رہی ہے۔ ایران کے ساتھ تعلقات کے حوالے سے سوال کے جواب میں ترجمان دفتر خارجہ نے کہا پاکستان کے ایران کے ساتھ تعلقات کشیدہ نہیں ہیں اور نہ ہی اس کے ساتھ پاکستان کی کوئی تلخی ہے بلکہ دونوں ممالک کے درمیان اچھے تعلقات ہیں اور ایران ہمارا بہتر اسلامی اور پڑوسی دوست ملک ہے۔ پاکستان اورایران کے درمیان تلخی کے حوالے سے تمام باتیں بے بنیاد ہیں۔ انہوں نے کہا کہ اس بات کا اندازہ اس بات سے لگایا جاسکتاہے کہ ، گزشتہ دنوں ایران کے وزیرخازرجہ جوادظریف پاکستان آئے تھے اورانہوں نے پاکستان کی اعلیٰ قیادت سے ملاقاتیں کیں جو انتہائی کامیاب رہیں ۔انہوں نے کہاکہ ایران اور پاکستان کے درمیان مسلسل رابطہ رہتا ہے۔

موضوعات:کلبھوشن یادیو