کراچی ( این این آئی)جماعت قادریہ علیمیہ پاکستان کے زیراہتمام دارالعلوم قادریہ سبحانیہ شاہ فیصل کالونی نمبر5کراچی میں فضائل اولیائے کرام کانفرنس سے خطاب کرتے ہوئے مفتیء اعظم پاکستان مفتی فضل سبحان القادری نے کہاہے کہ اولیاء اللہ کی تعلیمات قرآن وسنّت کے مطابق ہیں

،اگر کوئی قرآن وسنت اور شریعت کے منافی عمل کرے وہ اللہ کا ولی نہیں ہوسکتا۔اسلام کے خلاف پروپیگنڈاکرکے لوگوں کو دین سے بیزارکرنے کی سازش کی جارہی ہے، ان سازشوں کا مقابلہ کرنے کے لئے اولیاء اللہ کے دامن سے وابستہ ہوناضروری ہے، اسلام کے نام پر قائم ہونے والے ملک میں اسلام دشمن فتنہ پرور لادینیت اور بے راہ روی کا جال پھیلارہے ہیں لیکن علماء ومشائخ اپناروایتی کرداراداکرتے ہوئے دین دشمنوں کا مقابلہ جاری رکھیں گے۔کانفرنس سے مرکزی جماعت اہلسنّت پاکستان کراچی کے امیر ومیزبان مفتی الشاہ محمد عبدالعلیم قادری ضیائی، علامہ فیض الہادی قادری علیمی ، مفتی عبدالباسط قادری علیمی ودیگر علمائے کرام نے بھی خطاب کیا۔مفتی عبدالعلیم قادری ودیگرمقررین نے کہاکہ اولیاء اللہ کی تعلیمات کو ہر سطح پر عام کرناوقت کی اہم ضرورت ہے،کسی کو اسلام کے عقائد وشعائر سے کھیلنے نہیں دیں گے۔انہوں نے کہاکہ ہمارے اکابرین نے مملکت خدادادپاکستان کے قیام کے لئے بیش بہاقربانیاں دی ہیں ،ان قربانیوں اور خدمات کو رائیگاں نہیں جانے دیں گے۔