کراچی (این این آئی) شہرقائد میں کورونا سے حفاظت کے لیے ماسک نہ پہننے والے پولیس اہلکار وافسران پرجرمانہ عائد کرنے کا فیصلہ کیا گیا ہے ۔تفصیلات کے مطابق ایڈیشنل انسپکٹر جنرل(اے آئی جی)کراچی عمران یعقوب نے ماسک نا پہننے والے پولیس افسر واہلکار پر جرمانہ لگانے کا حکم نامہ جاری کردیا ہے۔کورونا کے تیزی سے پھیلا ؤکے باعث یہ ہدایت نامہ جاری ہوا ہے۔ پولیس افسرواہلکار کی جرمانے پر ایک روز کی
تنخواہ کاٹی جائے گی۔کراچی پولیس کے تمام افسران کو سختی سے ماسک لگانے کی ہدایت کردی گئی۔ حکم نامہ آپریشن، انویسٹی گیشن اور ٹریفک پولیس کے لیے ہے۔ فیلڈ میں سفر کے دوران یا سرکاری گاڑیوں میں ماسک استعمال کریں۔حکم نامہ میں پابند کیا گیا ہے کہ اہلکار دوران ڈیوٹی عوام سے بات کرتے وقت بھی ماسک پہنیں۔ ایڈیشنل آئی جی کا حکم نامہ تمام تھانوں اور دفاتر میں آویزاں کرنے کی ہدایت کردی گئی۔
