کراچی(آن لائن)وفاقی اردو یونیورسٹی میں سلیکشن بورڈ کا ڈیٹا غائب ہوگیا۔ اطلاعات کے مطابق سابق قائم مقام رجسٹرار ڈاکٹر صارم نے 2013 اور 2017 کے سلیکشن بورڈ کا ڈیٹا نئے وائس چانسلر کو دینے سے انکار کرتے ہوئے موقف اختیار کیا ہے کہ ان کے پاس دونوں سلیکشن بورڈ
کا ڈیٹا موجود نہیں ہے۔ یونیورسٹی میں سابق قائم مقام وائس چانسلر ڈاکٹر روبینہ مشتاق کو 2013 اور 2017 کے سلیکشن بورڈ منعقد کروانے کا حکم جاری کیا تھا۔ تاہم ابھی سلیکشن بورڈ کی کارروائی جاری تھی اور چند شعبہ جات کے سلیکشن بورڈ ابھی منعقد ہونا باقی تھے کہ ڈپٹی چئیر سینیٹ اے کیو خلیل نے ان کو عہدے سے ہٹا کر قائم مقام وائس چانسلر کے اختیارات اپنے ہاتھوں میں لے لئے۔ بعد ازاں سینیٹ نے ڈپٹی چئیر کے اس اقدام کی توسیق نہیں کی اور علامہ اقبال اوپن یونیورسٹی کے وائس چانسلر کو مستقل وائس چانسلر کی تقرری تک اردو یونیورسٹی کا قائم مقام وائس چانسلر مقرر کیا۔ سلیکشن بورڈ کی کارروائی اور متعلقہ ریکارڈ طلب کرنے پر سابق قائم مقام رجسٹرار ڈاکٹر صارم نے تحریری موقف اختیار کیا ہے کہ ان کے پاس سلیکشن بورڈ کا کوئی ڈیٹا موجود نہیں ہے۔ یونیورسٹی میں اعلی انتظامی عہدوں پر موجود افسران کہا کہنا ہے کہ یہ معاملہ سنگین نوعیت کا ہے۔ انتظامیہ اس سلسلے میں قانون۔کے مطابق کارروائی عمل میں لائے گی۔ سینیٹ کی فیصلے کی روشنی میں سلیکشن بورڈ کو جلد از جلد مکمل کروایا جائے گا اور اس سلسلے میں موصول ہونے والے شکایات کا جائزہ لیا جا رہا ہے۔
