جدہ(این این آئی)بارشوں کی لہر کے بعد مکہ مکرمہ کے پہاڑوں پر سبزے کا بچھونا بچھ گیا ، وادیاں سرسبز و شاداب نخلستان میں تبدیل ہو گئیں، ہرطرف ہریالی اور مکہ مکرمہ کے پہاڑوں پر سفید بگلے عوام اورسیاحوں کی توجہ کر مرکز بن گئے ۔بارش کے بعد مکہ کے آسمان پرخوبصورت پرندے اڑتے دکھائی دیتے ہیں۔

یہ ہجرت کرنے والے پرندوں کے جھنڈ ہیں جنہیں مکہ معظمہ کے پہاڑوں پر محو استراحت اور فضاء میں پرواز کرتے ہوئے دیکھا جا سکتا ہے۔ ان پرندوں کی وجہ سے بننے والی خوبصورتی کا عکس سوشل میڈیا پر بھی دیکھا جا سکتا ہے۔ فوٹوگرافر منصور الحربی نے ان مناظر کو اپنے کیمرے کی آنکھ میں محفوظ کیا۔ انہوں نے العربیہ ڈاٹ نیٹ سے بات کرتے ہوئے کہاکہ میں مکہ مکرمہ کے علاقے کے ماحول اور فطرت کی تصویر کشی کرنے کے لیے جا رہا تھا کہ میں نے مسلسل بارشوں کے نظارے بھی کئے۔ جب میں مکہ مکرمہ کے شمال میں جموم کے علاقے سے گذرا تو پرندوں کے نظارے نے مجھے روک لیا۔ یہ سب نقل مکانی کرنے والے پرندے تھے اور ان کی وجہ سے مکہ معظمہ کے پہاڑوں کا منظر بہت خوبصورت اور دلکش تھا۔انہوں نے کہاکہ میں نے پرندوں کی بہ دولت زمین کی تزئین اور سبز رنگ میں ڈھکے پہاڑوں کی زیادہ زاویوں میں تصاویر لی ہیں۔انہوں نے کہاکہ سفید بگلے کی پہچان ایک بڑی اور موٹی پیلے رنگ کی چونچ سے ہوتی ہے اوراس کی لمبی سرمئی سبز ٹانگیں ہوتی ہیں۔ یہ بڑی جھیلوں کے قریب درختوں پر افزائش پاتا ہے اور وسیع گیلے علاقوں تک سفر کرتا ہے۔یہ پرندہ اتھلے پانیوں میں اپنی خوراک تلاش کرتا ہے۔ خشک جگہوں میں کیڑے، پانی میں مچھلیاں، مینڈک، کبھی کبھار رینگنے والے جانور اور چھوٹے کیڑے کھاتا ہے۔

موضوعات:مکہ مکرمہ