اسلام آباد (نیوز ڈیسک) حکومتِ پاکستان نے قومی کرکٹ ٹیم کو ہدایت جاری کی ہے کہ وہ 15 فروری 2026 کو بھارت کے خلاف آئی سی سی مینز ٹی ٹوئنٹی ورلڈ کپ کا مقررہ میچ شیڈول کے مطابق کھیلے۔
چیئرمین پاکستان کرکٹ بورڈ محسن نقوی نے وزیراعظم محمد شہباز شریف کو پی سی بی، انٹرنیشنل کرکٹ کونسل (آئی سی سی) اور بنگلہ دیش کرکٹ بورڈ کے درمیان ہونے والے اعلیٰ سطحی مشاورتی اجلاسوں سے آگاہ کیا۔ بریفنگ میں موجودہ صورتحال اور اس سے متعلق مختلف تجاویز پر تفصیل سے روشنی ڈالی گئی۔حکومت نے بنگلہ دیش کرکٹ بورڈ کی جانب سے موصول باضابطہ مراسلوں اور سری لنکا، متحدہ عرب امارات سمیت دیگر رکن ممالک کے خطوط کا بھی جائزہ لیا، جن میں پاکستان سے موجودہ تعطل کے خاتمے کے لیے مثبت اور قائدانہ کردار ادا کرنے کی اپیل کی گئی تھی۔ اس کے ساتھ بنگلہ دیش کرکٹ بورڈ کے صدر امین الاسلام کے بیان کو بھی سراہا گیا اور برادر ملک کی جانب سے اظہارِ تشکر کا خیرمقدم کیا گیا۔اسی تناظر میں وزیراعظم شہباز شریف نے سری لنکا کے صدر انورا کمارا ڈسانائیکے سے ٹیلیفونک رابطہ کیا۔ دونوں رہنماؤں نے دوستانہ ماحول میں گفتگو کرتے ہوئے پاکستان اور سری لنکا کے دیرینہ تعلقات اور مشکل اوقات میں باہمی تعاون کو یاد کیا۔ سری لنکن صدر نے موجودہ معاملے کے خوش اسلوبی سے حل کے لیے پاکستان سے سنجیدہ غور و فکر کی درخواست بھی کی۔
دوست ممالک کی آرا اور مشاورت کے نتائج کو مدنظر رکھتے ہوئے حکومت نے قومی ٹیم کو ہدایت دی ہے کہ وہ ورلڈ کپ کے تحت بھارت کے خلاف طے شدہ مقابلے میں شرکت کرے۔ حکومتی مؤقف کے مطابق یہ فیصلہ کھیل کے تسلسل اور اسپورٹس مین اسپرٹ کے فروغ کے پیش نظر کیا گیا ہے تاکہ عالمی سطح پر کرکٹ کی روایت برقرار رہے۔
وزیراعظم اور پوری قوم نے ’’مین اِن گرین‘‘ کے لیے نیک خواہشات کا اظہار کرتے ہوئے امید ظاہر کی ہے کہ قومی ٹیم میدان میں بہترین کارکردگی دکھاتے ہوئے قومی وقار اور کھیل کے مثبت جذبے کی بھرپور عکاسی کرے گی۔
