لاہور (این این آئی)پنجاب حکومت نے رمضان المبارک سے قبل عوام کو ریلیف فراہم کرنے کے لیے رمضان بچت فیسٹیول کا انعقاد کرنے کا اعلان کیا ہے،
یہ فیسٹیول 13فروری سے 15فروری تک جیلانی پارک میں ہوگا۔اس حوالے سے ڈی جی فوڈاتھارٹی عاصم جاوید کی تمام سٹیک ہولڈرز کے ساتھ میٹنگ، انتظامات پر تفصیلی بریفنگ دی گئی ۔ انہوں نے بتایا کہ وزیر اعلی پنجاب کی ہدایت پر عوام الناس کے لیے ریلیف سٹالز قائم کیے جائیں گے، ماہ مبارک سے قبل آٹا،گھی، دالیں، چینی، چاول، پھل سبزیاں اور دیگر اشیا خورونوش سستے داموں دستیاب ہوں گی، رمضان بچت فیسٹیول میں فوڈ سٹالز کے ساتھ فوڈ سیفٹی اور معیار کو یقینی بنانے کے خصوصی انتظامات کیے گئے ہیں۔فیسٹیول میں فوڈ سٹالز کے ساتھ مقامی ثقافت، روایات اور علاقائی رنگ کو مختلف تقریبات میں نمایاں کیا جائے گا۔ ڈی جی فوڈاتھارٹی نے کہا کہ وزیر اعلی پنجاب کے حکم پر فیملیز کے لیے محفوظ، خوشگوار اور عوام دوست ماحول کی فراہمی کو یقینی بنایا جائے گا، رمضان کے آغاز سے قبل سستی اور معیاری اشیا کی دستیابی سے ہر خاص و عام کو ریلیف ملے گا،
فیسٹیول میں ہر قسم کی اشیا پر خصوصی رعایت دی جائے گی۔ عاصم جاوید نے کہا کہ اشیا خورونوش کی کوالٹی برقرار رکھنے کیلئے فوڈ اتھارٹی ٹیمیں مسلسل نگرانی کریں گی، تمام سٹالز پر اشیائے خوردونوش کی فراہمی اور قیمتوں کو مانیٹر کیا جائے گا۔
