اسلام آبا د (نیوز ڈیسک ) کولمبو: آئی سی سی مینز ٹی ٹوئنٹی ورلڈ کپ کے دوران سری لنکا کے کرکٹر بھانوکا راجاپکسا کے ایک بیان نے نیا تنازع کھڑا کر دیا ہے،

جس میں انہوں نے بھارتی بلّے بازوں کے زیرِ استعمال بیٹس پر اعتراضات اٹھائے ہیں۔بھانوکا راجاپکسا نے دعویٰ کیا ہے کہ بھارتی بیٹرز ایسے خصوصی بلّے استعمال کر رہے ہیں جو انہیں کھیل میں اضافی اور غیر منصفانہ برتری فراہم کرتے ہیں، جس پر کرکٹ حلقوں میں بحث شروع ہو گئی ہے۔اتوار کے روز کولمبو میں کھیلے گئے میچ میں سری لنکا نے آئرلینڈ کو 20 رنز سے شکست دے کر ورلڈ کپ میں اپنی مہم کا کامیاب آغاز کیا، تاہم میچ کے بعد سامنے آنے والے راجاپکسا کے بیانات نے میچ کے نتیجے کو پسِ منظر میں دھکیل دیا۔خبر رساں ادارے سے گفتگو کرتے ہوئے انہوں نے کہا کہ بھارتی کھلاڑیوں کے بلّے اس معیار سے کہیں آگے ہیں جو دیگر ٹیموں کو دستیاب ہوتے ہیں۔ ان کا کہنا تھا کہ بعض اوقات یوں لگتا ہے جیسے ان بلّوں پر کسی خاص مادے یا ربڑ کی تہہ لگی ہوئی ہو، اور ایسے بلّے عام کھلاڑیوں کے لیے قابلِ حصول بھی نہیں ہوتے۔اگرچہ راجاپکسا نے ان الزامات کے حوالے سے کوئی باضابطہ شکایت درج نہیں کروائی، تاہم ان کے بیان کے بعد سوشل میڈیا پر مختلف قیاس آرائیاں گردش کرنے لگیں۔

یہ امر بھی قابلِ ذکر ہے کہ بھانوکا راجاپکسا سری لنکن ورلڈ کپ اسکواڈ کا حصہ نہیں ہیں، جبکہ اب تک بھارتی ٹیم یا انٹرنیشنل کرکٹ کونسل کی جانب سے ان دعوؤں پر کوئی ردِعمل سامنے نہیں آیا۔