اسلا م آباد (نیوز ڈیسک) بھارتی اوپنر روہت شرما نے ون ڈے کرکٹ میں سب سے زیادہ چھکے مارنے کا نیا عالمی ریکارڈ قائم کرتے ہوئے سابق پاکستانی آل راؤنڈر شاہد آفریدی کو پیچھے چھوڑ دیا۔ روہت شرما کے مجموعی چھکوں کی تعداد 352 ہوگئی ہے، جب کہ آفریدی 351 چھکوں کے ساتھ دوسرے نمبر پر چلے گئے۔جنوبی افریقہ کے خلاف ون ڈے سیریز کے پہلے میچ میں روہت شرما نے اننگز کا آغاز کرتے ہوئے 57 رنز اسکور کیے اور اس دوران 3 بلند و بالا چھکے بھی لگائے۔

یہی تین چھکے ان کے مجموعی ریکارڈ کو آفریدی سے آگے لے گئے۔ روہت نے یہ سنگ میل 269 اننگز میں حاصل کیا، جب کہ شاہد آفریدی نے 369 اننگز میں 351 چھکے لگائے تھے۔چھکوں کی اس فہرست میں ویسٹ انڈیز کے کرس گیل تیسرے نمبر پر ہیں جن کے کھاتے میں 294 اننگز میں 331 چھکے شامل ہیں۔اگر تمام فارمیٹس (ٹیسٹ، ون ڈے اور ٹی ٹوئنٹی) کے مجموعی چھکوں کو دیکھا جائے تو روہت شرما پہلے ہی سرفہرست تھے اور اب بھی 645 چھکوں کے ساتھ نمبر ون پوزیشن پر موجود ہیں۔ ان کے بعد کرس گیل کا نمبر آتا ہے جنہوں نے 553 چھکے لگائے ہیں، جبکہ شاہد آفریدی 476 چھکوں کے ساتھ تیسرے نمبر پر ہیں۔