اسلام آباد (نیوز ڈیسک)ورلڈ چیمپئن شپ لیجنڈز لیگ (WCL) میں ایک نیا تنازعہ اس وقت سامنے آیا جب بھارت سے تعلق رکھنے والے پانچ سابق معروف کرکٹرز نے اعلان کیا کہ اگر شاہد آفریدی پاکستان چیمپئنز کی نمائندگی کرتے ہیں تو وہ ان کے خلاف ہونے والا میچ کھیلنے سے اجتناب کریں گے۔معروف صحافی مرتضیٰ علی شاہ نے مائیکرو بلاگنگ پلیٹ فارم ایکس (سابقہ ٹوئٹر) پر بتایا کہ ان بھارتی لیجنڈز نے لیگ کی انتظامیہ کو باضابطہ طور پر آگاہ کر دیا ہے کہ وہ 20 جولائی کو برمنگھم میں پاکستان کے خلاف میدان میں نہیں اتریں گے اگر شاہد آفریدی ٹیم کا حصہ رہے۔

یہ امر قابل ذکر ہے کہ شاہد آفریدی نے ماضی میں متعدد مواقع پر کشمیری عوام کے حق میں آواز بلند کی ہے اور بھارتی حکومت کی جانب سے مقبوضہ کشمیر میں انسانی حقوق کی خلاف ورزیوں پر شدید تنقید کرتے آئے ہیں، جس کے باعث وہ بھارتی میڈیا اور حلقوں میں کئی بار تنقید کی زد میں آ چکے ہیں۔بھارتی کھلاڑیوں کے اس فیصلے نے نہ صرف لیجنڈز لیگ کی شفافیت اور اسپورٹس مین اسپرٹ پر سوالات اٹھائے ہیں بلکہ کھیل سے سیاست کو جوڑنے کے رجحان پر بھی بحث چھیڑ دی ہے۔ ابھی تک لیگ کی انتظامیہ یا شاہد آفریدی کی جانب سے اس معاملے پر باضابطہ ردعمل سامنے نہیں آیا۔