اسلام آباد (نیوز ڈیسک)ویسٹ انڈیز کے عظیم بلے باز برائن لارا نے اپنے کیریئر کے دوران درپیش چیلنجز پر گفتگو کرتے ہوئے آسٹریلیا کے مایہ ناز لیگ اسپنر شین وارن کو سب سے زیادہ مشکل بولر قرار دیا ہے۔ایک حالیہ انٹرویو میں، جہاں ان کے ساتھ سابق انگلش کرکٹرز سر ایلسٹیئر کک، فل ٹفنل اور مائیکل وان بھی شریک تھے، لارا نے شین وارن اور سری لنکن آف اسپنر متھیا مرلی دھرن دونوں کو زبردست باؤلرز قرار دیا، مگر شین وارن کو اپنے لیے بڑا خطرہ قرار دیا۔
لارا نے کہا کہ اگرچہ مرلی دھرن ان پر زیادہ دباؤ ڈالتے تھے اور ابتدائی آدھے گھنٹے میں ان کی گیندوں کو سمجھنا خاصا مشکل ہوتا تھا، تاہم شین وارن کی گیندیں زیادہ تر بیٹ پر آ جاتی تھیں، لیکن وہ کسی بھی لمحے ایسی جادوانہ ڈلیوری یا اسپیل کر سکتے تھے جو پوری اننگز کا رخ بدل دیتا۔ اسی لیے لارا نے شین وارن کو اپنے کریئر کا سب سے چیلنجنگ باؤلر تسلیم کیا۔خیال رہے کہ شین وارن نے 1992 سے 2007 کے دوران آسٹریلیا کی نمائندگی کرتے ہوئے 145 ٹیسٹ میچز میں 708 کھلاڑیوں کو پویلین واپس بھیجا۔ وہ 2022 میں 52 سال کی عمر میں دل کا دورہ پڑنے سے چل بسے۔
