جمیکا (این این آئی)اس وقت جب کرکٹ ماہرین اور شائقین ویان ملڈر کی 367 رنز اننگ کی تعریف کر رہے ہیں تاہم کرس گیل نے جنوبی افریقی کپتان پر کڑی تنقید کی ہے۔ویسٹ انڈیز کو تن تنہا کئی فتوحات دلانے والے سابق جارح مزاج اور ریکارڈ ساز بلے باز کرس گیل نے 367 رنز کی ناقابل شکست اننگ کھیلنے والے جنوبی افریقہ کے بیٹر ویان ملڈر کے اپنی اننگ ڈیکلیئر کرنے کے فیصلے پر انہیں کڑی تنقید کا نشانہ بنایا ہے۔27 سالہ ویان ملڈر ویسٹ انڈیز کے سابق لیجنڈ کرکٹر برائن لارا کے ٹیسٹ کرکٹ میں 400 رنز کا عالمی ریکارڈ توڑنے سے صرف 34 رنز دور تھے کہ انہوں نے 367 رنز پر اپنی اننگ ڈیکلیئر کرنے کا اعلان کر دیا۔

برائن لارا کے ہم وطن اور سابق ساتھی کرس گیل نے اگرچہ ملڈر کے جذبے کو سراہا، تاہم انہوں نے اسے جنوبی افریقی بیٹر کی گھبراہٹ میں کی گئی ایک بڑی غلطی قرار دیا اور کہا کہ ایسے موقع بار بار نہیں ملتے۔ ہمیں معلوم نہیں کہ وہ 400 بنا پاتے یا نہیں، لیکن کوشش کرنی چاہیے تھی۔کرس گیل نے کہا کہ لیجنڈ وہی بنتا ہے، جو ریکارڈ بناتا ہے اور ملڈر نے افراتفری میں لیجنڈ بننے کا موقع گنوا دیا۔سابق ویسٹ انڈین کرکٹر نے مزید کہا،”یہ وہی ٹیسٹ کرکٹ ہے، کبھی آپ زمبابوے جیسی ٹیم کے خلاف بھی ایک رن نہیں بنا پاتے۔ اس لیے کسی بھی ٹیم کے خلاف بننے والا سو، ڈبل یا ٹرپل سنچری، یہ سب ٹیسٹ کرکٹ کی کامیابیاں ہیں۔کرس گیل نے کہا،”اگر مجھے کبھی 400 رنز بنانے کا موقع ملتا تو میں وہ موقع ضائع نہ کرتا۔ یہ مواقع بار بار نہیں آتے۔ آپ کو معلوم نہیں کہ دوبارہ کبھی ٹرپل سنچری بنانے کا موقع ملے گا یا نہیں۔ جب ایسا موقع ملے، تو پوری کوشش کرنی چاہیے۔”