گال (این این آئی)بنگلہ دیش کی کرکٹ ٹیم کے تجربہ کار وکٹ کیپر مشفق الرحیم نے انٹرنیشنل کرکٹ میں آسٹریلیا کے سابق لیجنڈ وکٹ کیپر ایڈم گلکرسٹ کا قائم کردہ ریکارڈ سمیت متعدد دیگر ریکارڈز اپنے نام کرلیے ہیں۔

مشفق الرحیم نے سری لنکا کے خلاف دومیچوں کی ٹیسٹ سیریز کے پہلے میچ کے دوسرے روز میزبان ٹیم کے خلاف 163 رنز کی شان دار اننگز کھیلی اور اس دوران انہوں نے عالمی ریکارڈ بھی بنالیا۔بنگلہ دیش کے مایہ ناز وکٹ کیپر نے اس اننگز کے دوران انٹرنیشنل کرکٹ میں ایک گیند کرائے بغیر سب سے زیادہ رنز بنانے کا ریکارڈ توڑ دیا، جو اس سے قبل آسٹریلیا کے ایڈم گلکرسٹ کے پاس تھا۔

ایڈم گلکرسٹ نے 17 برس قبل انٹرنیشنل کرکٹ میں 15 ہزار سے زائد رنز بنا کر ایک گیند کرائے بغیر سب سے زیادہ رنز بنانے کا ریکارڈ بنایا تھا۔مشفق الرحیم نے سری لنکا کے خلاف پہلے ٹیسٹ کے دوسرے روز 163 رنز کی اننگز کے دوران انٹرنیشنل کرکٹ میں اپنے کیریئر کے 15 ہزار 502 رنز مکمل کیے اور یوں وہ بغیر کوئی گیند کرائے سب سے زیادہ رنز بنانے والے انٹرنیشنل کھلاڑی بن گئے۔آسٹریلیا کے ایڈم گلکرسٹ نے 15 ہزار 461 رنز بنا کر یہ ریکارڈ بنایا تھا تاہم اب وہ دوسرے نمبر پر چلے گئے ہیں۔تیسرے نمبر پر جنوبی افریقہ کے سابق وکٹ کیپر کوئنٹن ڈی کوک ہیں، جنہوں نے انٹرنیشنل کرکٹ میں ایک گیند بھی کرائے بغیر 12 ہزار 654 رنز بنائے ہیں۔