اسلام آباد (نیوز ڈیسک) پاکستان کرکٹ ٹیم کے ہیڈ کوچ مائیک ہیسن نے سابق کپتان بابر اعظم کو یقین دہانی کروائی ہے کہ وہ قومی ٹیم کے مستقبل کے منصوبوں کا اہم حصہ ہیں اور ان پر کسی بھی طرز کی کرکٹ کے دروازے بند نہیں ہوئے۔
ذرائع کے مطابق لاہور میں جاری قومی کھلاڑیوں کے تربیتی کیمپ کے دوران کوچنگ اسٹاف کی کھلاڑیوں سے ملاقاتوں کا سلسلہ جاری ہے۔ اس موقع پر مائیک ہیسن اور بابر اعظم کے درمیان تفصیلی گفتگو ہوئی، جس میں کوچ نے ٹیم کی کارکردگی میں بہتری کے لیے ان کی رائے بھی طلب کی۔
اطلاعات کے مطابق کوچ نے بابر سے یہ بھی پوچھا کہ انہیں کس فارمیٹ کی کرکٹ کھیلنے میں سب سے زیادہ لطف آتا ہے۔ ہیسن نے واضح کیا کہ بابر اعظم کو جب بھی ٹیم کو ان کی ضرورت محسوس ہو گی، انہیں ضرور موقع فراہم کیا جائے گا۔
اسی طرح تیز گیند باز شاہین شاہ آفریدی سے بھی الگ ملاقات ہوئی جس میں انہوں نے واضح کیا کہ وہ ریڈ اور وائٹ بال، دونوں طرز کی کرکٹ کے لیے دستیاب ہیں۔
تاہم ذرائع کا کہنا ہے کہ آئندہ دورہ بنگلا دیش کے لیے بابر اعظم اور محمد رضوان کی اسکواڈ میں شمولیت کے امکانات خاصے کم دکھائی دے رہے ہیں۔ ٹیم مینجمنٹ کا ماننا ہے کہ نئے کھلاڑیوں نے حالیہ ہوم سیریز میں اپنی صلاحیتوں کا لوہا منوایا ہے اور انہیں مزید موقع ملنا چاہیے۔
اس کے برعکس، شاہین آفریدی اور نوجوان بولر صفیان مقیم کی واپسی کے امکانات کافی روشن ہیں، تاہم اس حوالے سے حتمی فیصلہ آئندہ چند دنوں میں متوقع ہے۔
یاد رہے کہ قومی ٹیم آئندہ ماہ بنگلا دیش کے دورے پر تین ٹی ٹوئنٹی میچز کھیلے گی، تاہم میزبان کرکٹ بورڈ کی جانب سے ابھی تک میچوں کا شیڈول جاری نہیں کیا گیا۔
