لندن(این این آئی)انگلش پریمیئر لیگ کی ٹیم ویسٹ ہیم کے اسٹرائیکر مائیکل انتونیو کی فیراری کار خوفناک حادثے کا شکار ہو گئی، فٹ بالر کو آئی سی یو میں داخل کر دیا گیا۔ایسکس کاؤنٹی فائر اینڈ ریسکیو سروس کا کہنا ہے کہ انہوں نے ایپنگ میں ہونے والے حادثے کے مقام پر پہنچ کر اپنی گاڑی میں پھنسے اسٹرائیکر کو زخمی حالت میں باہر نکالا۔جمیکا کے فٹ بالر مائیکل کے بارے میں کہا جاتا ہے کہ وہ مستحکم حالت میں ہیں اور سینٹرل لندن کے ایک اسپتال میں قریبی نگرانی میں ہیں۔

ویسٹ ہیم کی جانب سے جاری بیان میں تصدیق کی گئی ہے کہ 34 سالہ فارورڈ کار حادثے میں زخمی ہو گئے ہیں، پریمیئر لیگ کلب نے مزید کہا کہ اس مشکل وقت میں، ہم سب سے درخواست کرتے ہیں کہ وہ مشیل اور ان کے خاندان کی پرائیویسی کا احترام کریں۔ایسکس پولیس کا کہنا ہے کہ حکام فیراری کار سے متعلق سنگین حادثے کی تحقیقات کر رہے ہیں اور عینی شاہدین اور ڈیش کیم فوٹیج کی مدد لی جا رہی ہے۔جمیکا کے بین الاقوامی کھلاڑی مائیکل انتونیو نے 2015 میں ناٹنگھم فاریسٹ سے ویسٹ ہیم میں شمولیت اختیار کی تھی اور اس کے بعد سے کلب کے لئے 268 لیگ میچوں میں 68 گول اسکور کیے ہیں۔