لاہور (این این آئی)عمان کی ہاکی ٹیم پاکستان کے خلاف چار میچز کی سیریز کھیلنے کیلئے پیر کو پہنچ گئی، پی ایچ ایف کے ڈائریکٹر ایڈمن میجر (ر) جاوید ارشد منج اور کرنل آصف ناز کھوکھر نے عمانی ٹیم کا استقبال کیا۔ پاکستان اور عمان کے درمیان سیریز کا پہلا میچ (آج) منگل نیشنل ہاکی سٹیڈیم، لاہور میں کھیلا جائے گا۔ اومان ٹیم کے ہیڈ کوچ طاہر زمان کا کہنا ہے کہ یہ دورہ ہماری ٹیم

کیلئے تجرباتی ہے جس سے کھلاڑیوں کو سیکھنے کو موقع ملے گا، پاکستان ورلڈ کلاس ٹیم ہے اور اس کا اومان سے کوئی مقابلہ نہیں۔  ہمارا ہدف جونیئر ایشیا کپ ہے جس کی تیاریوں کیلئے یہ میچز پلان کئے گئے ہیں۔ دونوں ٹیموں کے مابین دوسرا میچ (کل) بدھ، تیسرا 3 اکتوبر جبکہ چوتھا اور آخری میچ 6 اکتوبر کو کھیلا جائے گا، تمام میچز نیشنل سٹیڈیم، لاہور میں کھیلے جائیں گے۔