لاہور( آن لائن )پاکستان کرکٹ بورڈ(پی سی بی) کے منیجنگ ڈائریکٹر (ایم ڈی )وسیم خان نے پاکستان میں عالمی کرکٹ کی مستقل واپسی کا دعوی کر دیا۔نجی ٹی وی کو انٹرویو دیتے ہوئے وسیم خان نے کہا کہ سری لنکن ٹیم کو پاکستان لانے کے لیے کرکٹ بورڈ نے بڑی محنت کی۔وسیم خان نے ملک میں مستقل بنیادوں پر انٹرنیشنل کرکٹ کی واپسی کی نوید سناتے ہوئے کہا کہ پاکستانی ٹیم اب اپنی تمام ہوم سیریز ملک میں ہی کھیلے گی۔
اس موقع پر انہوں نے جلد ہی ایک اور کرکٹ سیریز کے پاکستان میں انعقاد کی خوشخبری سناتے ہوئے کہا کہ سری لنکا کے بعد جنوری میں بنگلا دیشی ٹیم کو پاکستان مدعو کیا ہے اور بنگلا دیش کے خلاف ہوم سیریز بھی پاکستان میں ہی منعقد کرائیں گے۔ انہوں نے واضح کیا کہ پی سی بی نے کپتان اور کوچ کے اختیارات کا تعین کردیا ہے اور ٹیم کی سلیکشن اور پلاننگ کا اختیار مصباح کے پاس ہے جب کہ فائنل الیون کپتان سرفراز احمد منتخب کریں گے۔
