اسلام آباد (این این آئی)پاکستانی شائقین سرفراز احمد کی حمایت میں سامنے آئے اور ان کی بہترین کارکردگی کا گن گانے لگے اور ٹوئٹر پر پاکستان کو سرفراز سے پیار ہے اورہم سرفراز کے ساتھ کھڑے ہیں ٹاپ ٹرینڈ بن گئے۔ایک شخص نے سرفراز احمد کی بطور کپتان کارکردگی کا حوالہ دیتے ہوئے ایک تصویر شائع کی جس میں انہیں انڈر 19 ورلڈکپ، چیمپئنز ٹرافی 2017 اور پاکستان سپر لیگ 2019 کی ٹرافی اٹھائے ہوئے دکھایا گیا ۔

ایک شخص نے سرفراز احمد کی چیمپیئنز ٹرافی ٹورنامنٹ کی ٹرافی کے ہمراہ سرفراز احمد کی تصویر شائع کی جس میں انہوں نے لکھا کہ ایسا کیسے ہوسکتا ہے کہ کوئی سرفراز احمد سے پیار نہ کرے۔ایک صارف نے لکھا کہ سرفراز احمد اپنے دو سالہ بیٹے کے ہمراہ تھے، تصور کریں کہ اگر آپ اپنے اہل خانہ کے ہمراہ ہوں اور کوئی آپ کے ساتھ اس طرح کا برتاؤ کرے تو کیسا محسوس ہو۔ان صارف کا کہنا تھا کہ اس شخص کی اس حرکت کو نظر انداز کرکے اچھا کیا، جو عملی طور پر ایک مشکل ترین کام تھا۔سماجی رابطوں کی ویب سائٹس پر شدید تنقید کی وجہ سے سرفراز احمد کی تضحیک کرنے والا شخص معافی مانگنے پر مجبور ہوگیا اور اس نے اپنی معافی کی ویڈیو بھی جاری کی۔اس ویڈیو میں اس شخص نے سب سے پہلے سرفراز احمد سے معافی مانگی اور پھر پوری قوم سے بھی معافی مانگی۔اس شخص نے کہاکہ واقعہ کے بعد سرفراز احمد کی ان سے بات ہوئی تھی، اور انہوں نے ویڈیو ڈیلیٹ بھی کر دی تھی، تاہم یہ کسی طرح اپ لوڈ ہوگئی، اس کا علم نہیں ہے۔انہوں نے کہا کہ مجھے نہیں معلوم تھا کہ اس ویڈیو کے ایسے نتائج سامنے آئیں گے، تاہم وہ اپنی اس ویڈیو پر ندامت محسوس کر رہے ہیں۔

سرفراز احمد کی حمایت میں عام لوگ ہی نہیں بلکہ سپورٹس کے صحافیوں اور بولی ووڈ شخصیات سامنے آئیں۔بولی ووڈ اسٹار رتیش دیش مکھ نے ایک ٹوئٹ کے جواب میں کہا کہ تاریخ میں کوئی نہ کوئی کپتان اہم ترین میچ ہارا ہے، سرفراز احمد اس (تضحیک) کے حقدار نہیں ہیں۔انہوں نے کہاکہ یہ ہراسانی کا معاملہ ہے، سرفراز احمد اپنے بچے کیساتھ تھے۔یاد رہےکہ پاکستان اور جنوبی افریقہ کے درمیان اہم ترین میچ کل کھیلا جائیگا۔