اسلام آباد (این این آئی)قومی ٹیم کے نوجوان اوپنر امام الحق نے کہا ہے کہ بھارت کے خلاف میچ دباؤ کا حامل ہے، ہر حال میں جیتنا ہو گا۔ ایک سوال کے جواب میں اوپننگ بلے باز امام الحق نے بھارت کے خلاف میچ کے حوالے سے سوال پر کہا کہ ہمارا ایک میچ بارش کی نذر ہو گیا جو ہمارے لیے انتہائی اہمیت کا حامل تھا، اب ہمارے لیے ہر میچ انتہائی اہم ہے لہٰذا یہ کہنا درست ہے کہ ہمیں ہر حال میں یہ میچ جیتنا ہو گا۔انہوںنے کہاکہ پاکستان اور بھارت کا میچ انتہائی دباؤ کا حامل ہوتا ہے اور اس طرح کے میچ کا حصہ بننا بہت بڑی بات ہے، یہ میچ مانچسٹر میں کھیلا جائے گا جہاں پاکستانی شائقین بڑی تعداد میں
موجود ہوں گے۔آسٹریلیا کے خلاف میچ میں سیٹ ہو کر وکٹ گنوانے کے حوالے سے سوال پر امام نے کہا کہ میں اچھا کھیل رہا اور یہ ٹیم مجھ پر اور بابر اعظم پر بہت زیادہ انحصار کرتی ہے، جب بابر آؤٹ ہوئے تو پھر ٹیم کو آگے لے جانے کی ذمے داری میری تھی تاہم میں جس گیند پر آؤٹ ہوا وہ وکٹ گنوانے والی گیند نہیں تھی، میں ویسٹ انڈیز کے خلاف میچ میں بھی ایسے ہی آؤٹ ہوا تھا۔امام الحق نے کہا کہ ایک پیشہ ورانہ کھلاڑی ہونے کی حیثیت سے ہمیں اپنے ملک کے لیے میچز جیتنے چاہئیں لیکن اگر ہم ایسا نہیں کر پاتے تو نصف سنچری کرنے کے باوجود بھی ہمیں بہت مایوسی ہوتی ہے۔
