لندن( آن لائن )پی ایس ایل کھیل کر پاکستانیوں کے دل جیتنے والے کیوی کرکٹر گرانٹ ایلیٹ نے پاکستانی بائولر پر بال ٹیمپرنگ کا الزام عائد کردیا، وہاب ریاض کو ریورس سوئنگ کی صلاحیت کی وجہ سے ورلڈکپ کھلانے کے بیان پر ردعمل دیتے ہوئے
کیوی کرکٹر نے موقف اختیار کیا کہ اگر 25 اوورز کے بعد گیند ریورس سوئنگ ہوئی تو یہ لازما ً بال ٹیمپرنگ کا نتیجہ ہوگا۔تفصیلات کے مطابق کیوی کرکٹر گرانٹ ایلیٹ نے الزام عائد کیا ہے کہ اگر ورلڈکپ کے دوران پاکستانی بائولرز نے ریورس سوئنگ کی تو یہ بال ٹیمپرنگ کا نتیجہ ہوگا۔ پی ایس ایل میں لاہور قلندرز کی نمائندگی کرنے والے اور سابق کیوی کرکٹر گرانٹ ایلیٹ کہتے ہیں کہ اب ایک روزہ کرکٹ میچ کے دوران 25 اوورز بعد گیند تبدیل کر دی جاتی ہے۔اسی باعث اب گیند کو ریورس سوئنگ کرنا ممکن نہیں ہے۔وہاب ریاض کی ریورس سوئنگ کی صلاحیت پر تبصرہ کرتے ہوئے گرانٹ ایلیٹ کا کہنا ہے کہ اگر ورلڈکپ کے دوران گیند ریورس سوئنگ ہوئی، تو یقینی طور پر یہ بال ٹیمپرنگ کا نتیجہ ہوگا۔ گرانٹ ایلیٹ کے اس بیان پر سوشل میڈیا پر ایک نئی بحث چھڑ گئی ہے۔ واضح رہے کہ آئی سی سی کرکٹ ورلڈ کپ کے انعقاد میں دو دن باقی رہ گئے۔ آئی سی سی کرکٹ ورلڈ کپ 30 مئی سے 14جولائی تک انگلینڈ میں منعقد ہوگا۔پاکستان اور بھارت کی کرکٹ ٹیمیں 16جون کو اولڈ ٹریفرڈ میں ٹکرائیں گی ۔ جبکہ پاکستان کرکٹ ٹیم ورلڈکپ کے سلسلے میں 31 مئی کو ویسٹ انڈیز کیخلاف ٹرینٹ برج میں اپنا پہلا میچ کھیلے گی۔
