ڈبلن(این این آئی)سہ ملکی ون ڈے انٹرنیشنل کرکٹ سیریز میں سنیل ایمبرس کی شاندار سنچری کی بدولت ویسٹ انڈیز نے آئرلینڈ کو 5وکٹوں سے شکست دے کر دوسری کامیابی حاصل کر لی، کالی آندھی نے 328رنز کا ہدف 48ویں اوور میں 5وکٹوں پر حاصل کیا۔
کالی آندھی نے بڑا ہدف حاصل کر کے نیا ملکی ریکارڈ بھی قائم کر دیا ہے، سنیل ایمبرس نے ڈٹ کر حریف بائولرز کا مقابلہ کیا اور 148رنز کی اننگز کھیل کر ٹیم کو فتح دلائی، بلبرائن کی سنچری، سٹرلنگ اور کیون اوبرائن کی نصف سنچریاں رائیگاں گئیں، ایمبرس میچ کے بہترین کھلاڑی قرار پائے۔ڈبلن میں کھیلے گئے سہ ملکی سیریز کے چوتھے میچ میں آئرش ٹیم نے پہلے کھیلتے ہوئے مقررہ اوورز میں 5وکٹوں پر 327رنز بنائے، اینڈی بلبرائن نے 135رنز کی عمدہ اننگز کھیلی، سٹرلنگ 77اور کیون اوبرائن 63رنز بنا کر آئوٹ ہوئے، شینن گبرائل نے 2وکٹیں لیں، جواب میں کالی آندھی نے مطلوبہ ہدف 47.5اوورز میں 5 وکٹوں پر پورا کیا، سنیل ایمبرس نے ڈٹ کر آئرش بائولرز کا مقابلہ کیا اور 148رنز کی اننگز کھیل کر آئرلینڈ کی جیت کی امیدوں پر پانی پھیر دیا، شائی ہوپ 30، روسٹن چیس 46، کپتان جیسن ہولڈر 36 رنز بنا سکے، جوناتھن کارٹر نے 43ناقابل شکست رنز بنا کر ٹیم کو کامیابی دلائی، بائیڈ رینکن نے 3وکٹیں لیں۔
