کراچی(این این آئی)ٹیسٹ کرکٹر احمد شہزاد نے آسٹریلیا کے خلاف ون ڈے سیریز کے لیے پاکستان کرکٹ ٹیم کی سلیکشن پر کئی سوالات اٹھاتے ہوئے کہا ہے کہ پی سی بی کی جانب سے آسٹریلیا کے خلاف سیریز کے اعلان میں جلد بازی کا مظاہرہ کیا گیا۔فارم واپس آتے ہی انداز بھی بدلنے والے احمد شہزاد نے نیشنل اسٹیڈیم میں میڈیا سے گفتگو کرتے ہوئے سلیکشن کمیٹی کو تنقید کا نشانہ بناتے ہوئے کہا کہ سلیکٹرز کو ٹیم کا اعلان کرنے سے پہلے پی ایس ایل ختم ہونے کا انتظار کرنا چاہیئے تھا،
پی ایس ایل فورکے اہم میچز سے پہلے قومی ٹیم کا اعلان غلط ہے۔احمد شہزاد نے پاکستان ٹیم کے ہیڈکوچ مکی آرتھر کو بھی آڑے ہاتھوں لیتے ہوئے کہا کہ مکی آرتھر کو معلوم ہونا چاہیئے کہ پی ایس ایل سے اچھے بلے باز نہیں ملتے،بہترین بولرز تو مل سکتے ہیں مگر اچھے بیٹسمین ڈومیسٹک کے چار روزہ میچز سے ہی ملتے ہیں، ڈومیسٹک کی کارکردگی کو نظر انداز کرنا غلط عمل ہے۔احمد شہزاد نے کہا کہ ورلڈکپ میں پاکستان کی نمائندگی کرنا چاہتا ہوں اور میگاایونٹ میں اپنے ملک کے لیے منفرد کارکردگی دکھانیکی خواہش ہے، دریں اثناء پاکستان کرکٹ ٹیم کے فاسٹ بالر محمد سمیع نے کہاہے کہ ڈومیسٹک میں اچھی کارکردگی کے باوجود مجھے ہمیشہ نظرانداز کیا گیا ہے۔نیشنل اسٹیڈیم میں میڈیا سے بات چیت کرتے ہوئے پی ایس ایل فور میں عمدہ بولنگ کا مظاہرہ کرنے والے اسلام آباد یونائیٹڈ کے کپتان و ٹیسٹ فاسٹ بولر محمد سمیع نے کہا کہ اچھی پرفارمنس کے باوجود آسٹریلیا کے خلاف ون ڈے سیریز کے کیے پاکستان ٹیم میں جگہ نہ بنا سکنے پر مایوس نہیں ہوں۔محمد سمیع نے کہا کہ ڈومیسٹک میں اچھی کارکردگی کے باوجود مجھے ہمیشہ نظرانداز کیا گیا،جب کہ پی ایس ایل کے دوران آسٹریلیا کے خلاف سیریز کے لیے پاکستان ٹیم کا اعلان سمجھ نہ سکا۔
