سینچورین(این این آئی)قومی کرکٹ ٹیم کے کپتان سرفراز احمد نے کہاہے کہ جنوبی افریقہ کیخلاف منصوبہ بندی کیساتھ میدان میں اتریں گے۔سینچورین میں کپتان سرفراز احمد نے اظہر علی کے ہمراہ پریس کانفرنس کرتے ہوئے سرفراز احمد نے کہا کہ ہیڈ کوچ مکی آرتھر نے جنوبی افریقا میں کوچنگ کی ہے لہٰذا انہیں تجربہ حاصل ہے اور پروٹیز کیخلاف منصوبہ بندی کے ساتھ میدان میں اتریں گے۔

انہوں نے کہا کہ سینچورین میں چوتھی اننگز کھیلنا بہت مشکل ہوتا ہے، سینچورین کی کنڈیشنز ہمارے ذہن میں ہے۔انہوں نے کہاکہ غیرملکی ٹیموں کو جنوبی افریقا میں کھیلنے میں دشواری پیش آتی ہے جو ٹیم ٹاس جیتتی ہے وہ پہلے بیٹنگ کرتی ہے اور 200 رنز کا تعاقب کرنا پڑ جائے تو چوتھی اننگز میں کوئی بیٹنگ نہیں کرنا چاہتا۔قومی ٹیم کے کپتان کے مطابق ہمارے پاس ورلڈ کلاس اسپنرز ہیں، یاسر شاہ کوالٹی لیگ اسپنر ہیں جبکہ جنوبی افریقا نے کافی عرصے سے اچھا لیگ اسپنر نہیں کھیلا لہٰذا ان کو یاسر شاہ کیخلاف مشکل پیش آئے گی۔اظہر علی نے کہا کہ ٹیم کا مورال بہت اچھا ہے اور ہر کوئی پرفارم کرنے کیلئے بیتاب ہے۔انہوں نے کہا کہ جنوبی افریقا کیخلاف سیریز چیلنج ہے، ہر کوئی محنت کر رہا ہے اور ہر کھلاڑی چیلنج سے بھرپور سیریز میں ملنے والے موقع سے فائدہ اٹھانا چاہتا ہے۔انہوں نے کہاکہ جنوبی افریقا کیخلاف ماضی کی سیریز سے سیکھتے ہوئے فائدہ اٹھانے کی کوشش کروں گا جبکہ جنوبی افریقا میں پہلی مرتبہ کھیلنے والوں کو بتانے کی کوشش کررہے ہیں کہ کنڈیشنز سے کیسے ہم آہنگ ہونا ہے۔