جوہانسبرگ(آئی این پی) قومی کر کٹ ٹیم نے طویل سیریز کیلئے جنوبی افریقہ میں ڈیرے ڈال لئے جہاں سخت جان ٹریننگ شروع کر دی۔ پریکٹس میچ اور پھر ٹیسٹ سیریز کے بڑے امتحان کی تیاریاں تیز کر دیں، کپتان سرفراز احمد نے بھی میزبان جنوبی افریقہ کے خلاف اونچی اڑان بھرنے کے لیے پرجوش ہیں۔یو اے ای کے اپنے سیکنڈ ہوم گراونڈ کے بعد اب پروٹیز کا دیس، سیمنگ اور بانسی وکٹوں پر مشکل امتحان کے لیے سخت جان مشقیں، قومی کھلاڑیوں نے دورہ جنوبی افریقہ کو کامیاب بنانے کے لیے ٹریننگ شروع کر دی۔

سیشنز میں بیٹنگ، بولنگ اور فیلڈنگ کے علاوہ فزیکل فٹنس پر بھی خصوصی توجہ دی جا رہی ہے، جنوبی افریقہ الیون کے خلاف قومی شاہین 19دسمبر سے پریکٹس میچ کھیلیں گے، تین ٹیسٹ میچز کی سیریز 26تاریخ سے شروع ہو گی۔کپتان سرفراز احمد قومی ٹیم کی جیت کے لیے پر امید ہیں، طویل دورانیے کے کرکٹ امتحان میں پروٹیز کو واضح برتری حاصل ہے، پاکستان اور جنوبی افریقہ کے درمیان دس ٹیسٹ سیریز کھیلی گئیں، چھ میں پروٹیز فاتح، صرف ایک ہارے جبکہ تین سیریز بے نتیجہ رہیں۔