کرکٹر وزیراعظم کے ملک پاکستان میں ہمارا سفیر بھی کرکٹ سے ہی متعلق ہوگا،افغانستان نے اسلام آباد میں اپنے نئے سفیر کے نام کا اعلان کردیا کابل (این این آئی)افغان حکومت نے کرکٹ بورڈ کے سابق شکراللہ عاطف مشعل کو پاکستان میں ملک کا نیا سفیر مقرر کر دیا ہے ۔افغان میڈیا کے مطابق مشعل کی تقرری حضرت عمر زاخیل وال کی جگہ کی گئی ہے

جنہوں نے چند ماہ پہلے صدر اشرف غنی کو اپنا استعفیٰ بھجوایا تھا تاہم نئی سفیر کی تقرری تک منظور نہیں کیا گیا تھا ۔افغان حکومت نے نئے سفیر کی تقرری سے متعلق باضابطہ اعلان جاری نہیں کیا اور اسلام آباد میں افغان سفارتی ذرائع نے میڈیا رپورٹس پر تبصرہ کر نے سے گریز کیا ۔یاد رہے کہ عاطف مشعل نے رواں ماہ افغان کرکٹ بورڈ کے سربراہی سے استعفیٰ دیا تھا جن کی جگہ عزیز اللہ فضلی کو کرکٹ بورڈ کا نیا چیئر مین مقرر کیا گیا تھا ۔نئے سفیر کو 2016میں کرکٹ بورڈ کا چیئر مین مقرر کیا گیا تھا چند دن پہلے بھارت میں افغانستان کے سفیر شیدا محمد ابدالی نے بھی استعفیٰ دیا تھا اور افغان تجزیہ نگاروں کے کہنا ہے کہ مستعفی ہونے والے سفارتکار افغانستان کی سیاست میں اہم کر دارادا کر نے کیلئے سر کاری عہدے چھوڑ رہے ہیں ۔افغانستان میں پارلیمانی انتخابات اکتوبر کی بیس تاریخ اور صدارتی انتخابات آئندہ سال اپریل میں ہونگے ۔یاد رہے کہ عاطف مشعل نے ابتدائی تعلیم کابل سے حاصل کی ہے اور بعد میں امریکی اور برطانوی یونیورسٹیوں میں اعلیٰ تعلیم حاصل کی ۔ کرکٹ بورڈ کی ذمہ داری سے قبل وہ صدارتی محل میں بھی ذمہ داریاں سرانجام دے چکے ہیں