لاہور(سپورٹس ڈیسک)ایشیاکپ کے آغاز میں اب چند ہی دن باقی رہ گئے ہیں تو ہم نے سوچا کچھ اسٹیٹس پر بھی نظر ڈال لی جائے، اسٹیٹس پر نظر ڈالی گئی تو پتا لگا کہ پاکستان کے مایہ ناز بلے باز بابر اعظم بھارت کے شیکھر دھون اور ویرات کوہلی کا ریکارڈ توڑنے کے بے حد نزدیک ہیں۔بابر اعظم اب تک اپنے کیریئر میں 46ایک روزہ میچز کھیل کر 1973رنز اسکور کرچکے ہیں۔

جن میں 7سینچریاں اور 8نصف سینچریاں شامل ہیں۔پاکستان کے لئے نمبر تین کی اہم پوزیشن پر کھیلنے والے بلے باز بابر اعظم نے بہت کم عرصے میں اپنی صلاحیتوں کا لوہا منوایا اور ٹیم کے ایک اہم رکن کی حیثیت اختیار کرگئے۔اب یہاں اسٹیٹس کی بات کرلیتے ہیں، بابر اعظم ایک روزہ کرکٹ میں 2000رنز مکمل کرنے کے بہت قریب ہیں، اب انہیں یہ سنگ میل عبور کرنے کے لئے محض 27رنز کی ضرورت ہے۔بھارت کی جانب سے تیز ترین 2000رنز مکمل کرنے کا ریکارڈ موجودہ اوپنر شیکھر دھون کے پاس ہے جنہوں نے 49میچوں میں یہ کارنامہ انجام دیا۔ اس کے علاوہ ویرات کوہلی نے یہی کارنامہ 56میچ کھیل کر سرانجام دیا۔اگر بابر اعظم اگلے میچ میں 27یا اس سے زائد رنز اسکور کرنے میں کامیاب ہوتے ہیں تو وہ شیکھر دھون اور ویرات دونوں کا ریکارڈ توڑ دیں گے۔ایک روزہ کرکٹ میں تیز ترین 2000رنز مکمل کرنے کا ریکارڈ جنوبی افریقی بلے باز ہاشم آملہ کے پاس ہے جنہوں نے محض 41میچوں میں یہ کارنامہ سرانجام دیا۔پاکستان کی جانب سے ظہیر عباس نے صرف 45اننگز کھیل کر 2000رنز مکمل کئے اور وہ اس فہرست میں دوسرے نمبر پر ہیں۔