لندن(مانیٹرنگ ڈیسک) سابق انگلش کرکٹر جیمز ٹیلر قومی مینز ٹیم کے کل وقتی انڈیپنڈنٹ سلیکٹر مقرر ہو گئے۔ ٹیلر نیشنل سلیکٹر ایڈ سمتھ کے ساتھ مل کر کام کرینگے، دونوں سلیکٹرز ہیڈکوچ ٹریور بیلس کے ساتھ تین رکنی پینل بنا کر ٹیسٹ، ون ڈے اور ٹی ٹونٹی ٹیموں کا چناؤ کرینگے۔ 28 سالہ ٹیلر کو 2016ء میں دل کی بیماری کی تشخیص ہوئی تھی جس کے فوراً بعد انہوں نے انٹرنیشنل کرکٹ کو خیرباد کہہ دیا تھا ۔تاہم اب وہ بطور سلیکٹر انگلش ٹیم کے ساتھ فرائض انجام دینگے، انہیں 7 ٹیسٹ اور 27 ایک
روزہ بین الاقوامی کرکٹ میچز میں ملک کی نمائندگی کا اعزاز حاصل ہے۔ انگلینڈ اینڈ ویلز کرکٹ بورڈ (ای سی بی) نے جیمز ٹیلر کی بطور انڈیپنڈنٹ سلیکٹر تقرری کی تصدیق کرتے ہوئے کہا ہے کہ وہ باصلاحیت کرکٹر تھے اور ان کے مشورے ٹیم کی کارکردگی کو مزید بہتر بنانے میں مفید ثابت ہوں گے۔ جیمز ٹیلر نے کہا کہ انگلش ٹیم کا سلیکٹر مقرر ہونا میرے لئے بڑے اعزاز کی بات ہے، یہ بہت اہم ذمہ داری ہے، کوشش ہو گی کہ حکام کی توقعات پر پورا اتروں اور میں ٹیم کے ساتھ دوبارہ کام کرنے کیلئے بہت پرجوش ہوں۔
