کولمبو(مانیٹرنگ ڈیسک )سری لنکا کے مایہ ناز اسپنر رنگنا ہیراتھ نے بڑھتی ہوئی عمر کو دیکھتے ہوئے رواں برس نومبر میں انٹرنیشنل کرکٹ سے ریٹائرمنٹ کا عندیا دے دیا۔ ہیراتھ نے ٹیسٹ کیریئر کو طول دینے کی غرض سے 2016 میں ٹی20 اور ون ڈے انٹرنیشنل کرکٹ سے ریٹائرمنٹ کا اعلان کیا تھا لیکن اب وہ 40 برس کے ہو گئے ہیں جس کی وجہ سے وہ سمجھتے ہیں کہ انہیں اب تمام طرز کی کرکٹ چھوڑ دینی چاہیے۔ ہیراتھ نے اپنے بیان میں کہا کہ میں خود کو خوش قسمت سمجھتا ہوں کہ مجھے طویل عرصے تک بین الاقوامی سطح پر ملک کی نمائندگی کا موقع ملا اور 18 سال تک کیریئر کے دوران ٹیم
کے لیے جو کچھ کیا مجھے اس پر فخر ہے۔ انہوں نے کہا کہ ہر کرکٹر کی زندگی میں یہ وقت آتا ہے، میں سمجھتا ہوں کہ میرا وقت بھی آ گیا ہے کہ میں تمام طرز کی کرکٹ کو خیرباد کہہ دوں۔ بائیں ہاتھ کے اسپنر نے کہا کہ جنوبی افریقہ کے خلاف ہوم ٹیسٹ سیریز کے دوران کوچ اور کپتان سے اس بارے مشاورت کر کے اپنے منصوبے کو حتمی شکل دوں گا اور مجھے لگتا ہے کہ نومبر میں انگلینڈ کے خلاف شیڈول سیریز میرے کیریئر کی آخری سیریز ہو گی اور تب تک میں ہر ٹیسٹ کھیلنا چاہتا ہوں۔ ہیراتھ نے 90 ٹیسٹ میچز میں 418 وکٹیں لے رکھی ہیں اور وہ ٹیسٹ کرکٹ کی تاریخ کے کامیاب ترین لیفٹ آرم باؤلر ہیں۔
