جوہانسبرگ(این این آئی)جنوبی افریقہ کے جے پی ڈومینی لسٹ اے کرکٹ کی تاریخ میں ایک اوور میں زیادہ رنز بٹورنے والے دنیا کے دوسرے بلے باز بن گئے، انہوں نے گزشتہ روز مومینٹم ون ڈے کپ میں کیپ کوبراز کی نمائندگی کرتے ہوئے نائٹس کے خلاف میچ میں ایک اوور میں 37 رنز بٹور کر یہ کارنامہ انجام دیا۔ 240 رنز کے ہدف کے تعاقب میں کوبراز کی اننگز کے 37ویں اوور میں ڈومینی نے
جارحانہ انداز اپناتے ہوئے ایڈی لائی کی خوب دھنائی کی اور 37 رنز بنا کر ٹیم کو فتح دلائی، انہوں نے ایڈی کی پہلی چار گیندوں پر مسلسل چھکے لگائے، پانچویں گیند پر دو رنز بنائے، چھٹی گیند جو کہ نو بال ہو گئی اس پر چوکا جڑ کر پانچ رنز حاصل کیا اور آخری گیند پر گیند کو بائونڈری سے باہر پھینکا، اس کے ساتھ ہی انہوں نے لسٹ اے کرکٹ میں ملک کی طرف سے ایک اوور میں زیادہ رنز بنانے کا
ہرشل گبز کا ریکارڈ بھی توڑ دیا جنہوں نے 2007ء میں منعقدہ ورلڈ کپ میں ہالینڈ کے بائولر وان بونگے کو اوور میں مسلسل چھ چھکے لگائے تھے، لسٹ اے کی تاریخ میں ایک اوور میں زیادہ رنز بنانے کا عالمی اعزاز زمبابوے کے ایلٹن چیگمبرا کو حاصل ہے جنہوں نے 2013-14ء میں ڈھاکہ پریمیئر لیگ میں بنگلہ دیشی بائولر الائودین کے اوور میں 39 رنز بنائے تھے۔
