لاہور( آن لائن) پی ایس ایل اسپاٹ فکسنگ اسکینڈل میں سزا یافتہ شرجیل خان پی سی بی کے خلاف پھٹ پڑے۔ لاہور میں وکیل شیغان اعجاز کے ہمراہ پریس کانفرنس کے دوران شرجیل خان کا کہنا تھا کہ زبردستی اسپاٹ فکسر بنایا جا رہا ہے، چیئرمین بورڈ میرے دلائل سنیں، وزیر اعظم، قائمہ کمیٹی برائے اسپورٹس اور آرمی چیف بھی معاملے کا نوٹس لیں۔

انہوں نے کہا کہ حلف اٹھا کر کہتا ہوں کہ کوئی غلط کام نہیں کیا، انصاف کی امید تھی لیکن میرے ساتھ زیادتی ہوئی، اینٹی کرپشن یونٹ نے مجھے جان بوجھ کر اس معاملے میں پھنسایا۔ شرجیل خان نے کہا کہ کیس بنانے کے بعد پی سی بی اینٹی کرپشن ٹریبیونل میں سماعت کے دوران کوڈ آف کنڈکٹ میں ترمیم کی گئی، یہ بات پی سی بی کی نیک نیتی کے خلاف جاتی ہے، ناکردہ جرم میں سزا میرے اور فیملی کے لیے تکلیف کا باعث بنی۔شرجیل خان نے کہا کہ اپنے خلاف الزامات سے کلیئر ہونے کے لیے آخری حد تک جاؤں گا، ٹریبیونل اور اپیل کے فیصلے کے خلاف ہائیکورٹ میں اپیل دائر کریں گے۔واضح رہے کہ پی ایس ایل سپاٹ فکسنگ اسکینڈل میں خالد لطیف پر 5 سال جبکہ شرجیل خان پر ڈھائی سال کی معطلی سمیت 5 سال کی پابندی عائد کی گئی ہے۔