اسلام آباد (مانیٹرنگ ڈیسک) پاکستان ٹی 20 رینکنگ میں پہلے نمبر پر آ گیا ہے، تفصیلات کے مطابق بھارت نے نیوزی لینڈ کو ٹی ٹوئنٹی میچ میں 53 رنز سے شکست دے دی ہے جس بناء پر پاکستان ٹی ٹوئنٹی رینکنگ میں پہلے نمبر پر پہنچ گیا ہے، اس طرح پاکستان 124 پوائنٹس کے ساتھ ٹی ٹوئٹی میں پہلی پوزیشن پربراجمان ہو گیا ہے،
اس موقع پر پاکستان کرکٹ ٹیم کے کپتان سرفراز احمد نے کہا کہ ٹی ٹوئنٹی رینکنگ میں پہلے نمبر پر آنا تاریخی لمحہ ہے انہوں نے کہا کہ ایک سال سے ٹیم شاندار پرفارمنس دے رہی ہے۔ پاکستان پہلی بار ٹی ٹوئنٹی رینکنگ میں پہلے نمبر پر آیا ہے۔ واضح رہے کہ بھارت کے خلاف تین ٹی ٹوئنٹی میچوں کی سیریز سے قبل سابق عالمی نمبر ایک نیوزی لینڈ کے پوائنٹس کی تعداد 125 تھی جبکہ سری لنکا کو ٹی20 سیریز میں کلین سویپ کرنے کے بعد پاکستان کے پوائنٹس کی تعداد 124 ہو گئی تھی، نیوزی لینڈ کو پہلے نمبر پر رہنے کے لیے سیریز میں 2-1 سے فتح کی ضرورت تھی مگر وہ پہلے ہی میچ میں انڈیا سے شکست کھا گئی ، اس وقت ٹی ٹوئنٹی رینکنگ کے مطابق پاکستان 124 پوائنٹس کے ساتھ پہلے، نیوزی لینڈ 121 پوائنٹس کے ساتھ دوسرے، ویسٹ انڈیز تیسرے، انگلینڈ چوتھے، بھارت پانچویں، جنوبی افریقہ چھٹے، آسٹریلیا ساتویں، سری لنکا آٹھویں، افغانستان نویں اور بنگلہ دیش دسویں نمبر پر موجود ہے۔ اگر اگلے دو ٹی ٹوئنٹی میچ نیوزی لینڈ کی ٹیم جیت جاتی ہے تو وہ دوبارہ پہلے نمبر پر آ جائے گی اگر نیوزی لینڈ ایک میچ اور ہار جاتا ہے تو اس صورت میں پاکستان کی رینکنگ پوزیشن میں فرق نہیں آ ئے گا۔
