لندن(این این آئی)جارحانہ بیٹنگ کے حوالے سے مشہور ویسٹ انڈیز کے اوپنر کرس گیل نے ہتک عزت کا مقدمہ جیت لیا۔آسٹریلوی میڈیا کے خلاف نیوساوتھ ویلز میں سپریم کورٹ کی4 رکنی
جیوری نے ہتک عزت کے مقدمے میں ویسٹ انڈیز کے اوپنر کے حق میں فیصلہ سنایا۔جیوری نے اپنے فیصلے میں کہا کہ میڈیا گروپ جنوری 2016ء میں کرکٹر پر لگائے گئے الزامات پر مبنی رپورٹ کے حوالے سے ثبوت پیش نہیں کرسکا ۔38 سالہ کرس گیل نے عدالتی فیصلہ پر خوشی اور جذبات سے بھرے الفاظ میں کہا کہ میں ایک اچھا آدمی ہوں ٗمجرم نہیں ہوں۔میڈیا رپورٹ کے مطابق فیئرفیکس میڈیا گروپ نے فیصلے پر تحفظات کا اظہار کیا اور کہاکہ وہ اس حوالے سے اپیل دائر کرنے پر غور کررہے ہیں ۔میڈیا گروپ نے ویسٹ انڈیز ٹیم کے مساج تھراپسٹ لیانا رسل کی جانب سے کرکٹر پر الزامات کی رپورٹ شائع کی تھی اور الزام عائد کیا تھاکہ ورلڈ کپ 2015ء ورلڈ کپ کے دوران کرس گیل ڈریسنگ روم میں ان کے سامنے بے لباس ہوگئے تھے ۔ویسٹ انڈیز کے کرکٹر نے میڈیا گروپ کے الزامات سے انکار کرتے ہوئے ان کے خلاف ہتک عزت کا دعویٰ دائر کیا تھا اور اب فیصلہ ان کے حق میں آیا ۔
