کراچی (این این آئی)سندھ فٹ بال ایسو سی ایشن کے سیکرٹری رحیم بخش سے بدتمیزی کرنے پر ڈسٹرکٹ سینٹرل فٹ بال کے سیکرٹری نے جہانگیر میموریل فٹ بال کلب کے آفیشل جنید جہانگیر اور اس کے کلب کو غیرمعینہ مدت کیلئے معطل کردیا ہے۔میڈیا رپورٹ کے مطابق سیکرٹری ڈسٹرکٹ فٹ بال کا کہنا ہے کہ جنید جہانگیر غیرمعینہ مدت تک سندھ فٹ بال کی کسی بھی سرگرمیوں میں حصہ نہیں لے سکیں گے۔دریں اثنا سندھ
فٹ بال کے سیکرٹری رحیم بخش نے اپنے بیان میں کہا کہ میں کراچی گیمز کی انتظامیہ سے درخواست کروں گا کہ وہ گیمز میں فٹ بال کیلئے ٹیمیں شامل کرنے کیلئے معطل کلب کے آفیشلز رابطہ نہ کریں اور اس کی ٹیموں کو ایونٹ میں شامل نہ کریں۔بصورت دیگر سندھ فٹ بال ایسو سی ایشن گیمز کے خلاف احتجاج اور قانونی کارروئی کا حق رکھتی ہے۔ ادھر چنیسر گوٹھ فٹبال گرائونڈ میں جاری فٹبال ٹورنامنٹ میں ملیر کی فٹبال کلب دلبود محمڈن کے دو پلیئرز ابرار اور سلمان کو ریفری سے گالم گلوچ اور اسٹنٹ ریفری پر تشدد کرنے پر پانچ،پانچ ہزار روپے جرمانہ اور چھ، چھ ماہ کی پابندی عائد کردی گئی۔
