لاہور ( این این آئی) سکیورٹی حکام کی جانب سے قذافی سٹیڈیم کے اطراف کے ہوٹلز ، ہاسٹلز اور گیسٹ ہاؤسز بند کرادیئے گئے ۔ذرائع کے مطابق قذافی سٹیڈیم میں ہونیوالے آزادی کپ کے تمام ترسکیورٹی انتظامات مکمل کرلیے گئے ہیں، سکیورٹی حکام نے قذافی اسٹیڈیم کے اطراف کے ہوٹلز،گیسٹ ہاؤسزاورہاسٹلزکوبھی بند کرا دیا۔زرائع کے مطابق ہوٹلز،ہاسٹلز اورگیسٹ ہاؤس مالکان سے شورٹی بانڈز لے لیے گئے ہیں،
ان مالکان کوپابند کیاگیا ہے کہ وہ پندرہ ستمبر تک کسی شخص کو رہائش فراہم نہیں کریں گے ،خلاف ورزی کرنیوالوں کو پانچ لاکھ جرمانہ کیا جائیگا۔دریں اثناء لاہور الیکٹرک سپلائی کمپنی ( لیسکو ) نے قذافی سٹیڈیم میں ورلڈ الیون اور قومی کرکٹ ٹیم کے درمیان ہونے والے میچز کے اوقات میں بجلی کی لوڈشیڈنگ نہ کرنے کا فیصلہ کر لیا، قذافی سٹیڈیم کو دو گرڈ سٹیشن اور پانچ الیون کے وی فیڈرزکی مددسے بلا تعطل بجلی فراہم کی جائیگی۔ذرائع کے مطابق قومی کرکٹ ٹیم اور ورلڈ الیون کے درمیان میچز کا آغاز آج ( منگل ) 12ستمبر سے ہوگا جس کے لئے لیسکو نے تمام انتظامات کو حتمی شکل دے دی ہے، لیسکو کی جانب سے گارڈن ٹاؤن اور شادمان گرڈ سٹیشن سے قذافی سٹیڈیم کو 15ستمبر تک چوبیس گھنٹے مسلسل بجلی فراہم کی جائیگی ، میچ کے اوقات میں شام پانچ سے رات بارہ بجے تک بجلی کی لوڈشیڈنگ نہیں کی جائیگی۔ قذافی سٹیڈیم میں میچز کے دوران آپریشن ونگ کے افسران کی ڈیوٹیاں لگا دی گئی ہیں، تین شفٹوں میں عملہ چوبیس گھنٹے ڈیوٹی کے فرائض انجام دے گا ، ڈائریکٹر آپریشنز چوہدری محمد انور مانیٹرنگ کریں گے۔علاوہ ازیں پنجاب بھر کی جیلوں کے قیدی بھی ورلڈ الیون اور قومی ٹیم کے درمیان تین ٹی ٹونٹی میچز دیکھ سکیں گے۔ آئی جی جیل خانہ جات نے صوبہ بھر کی جیلوں کے سپرنٹنڈنٹس کو احکامات جاری کئے ہیں کہ قیدیوں کی بیرکس میں آزادی کپ ٹی ٹونٹی سیریز کے میچز دکھانے کے انتظامات کئے جائیں ۔احکامات موصول ہونے کے بعد جیلوں کی بیرکس میں ٹی وی لگانے کا کام شروع کر دیا گیا ہے۔
