لاہور( این این آئی)مڈل آرڈر بلے باز عمر اکمل پاکستان ٹیم سے باہر ہونے کے بعد اپنی فٹنس پر خصوصی توجہ دینے میں مصروف ہیں۔اس حوالے سے عمر اکمل اپنی ویڈیوز سماجی رابطے کی ویب سائٹ انسٹاگرام پر پوسٹ کرتے رہتے ہیں اور ان کے مداح ان ویڈیوز سے کافی متاثر بھی ہوتے ہیں ۔رواں سال مئی میں عمر اکمل بھی پاکستان ٹیم کے 15 رکنی اسکواڈ کے ہمراہ انگلینڈ روانہ ہوئے تھے جہاں انہیں بھی اس خوش قسمت ٹیم کا حصہ بننا تھا

جس نے کرکٹ کی تاریخ میں ایک سنہرا باب رقم کرتے ہوئے چیمپیئنز ٹرافی 2017 کا ٹائٹل اپنے نام کیا تھا۔تاہم ایونٹ کے آغاز سے چند روز قبل ہی عمر اکمل کومینجمنٹ نے یہ کہتے ہوئے ٹیم سے ڈراپ کردیا تھا کہ وہ فٹنس ٹیسٹ پاس کرنے میں ناکام ہوگئے ہیں جبکہ ان کی جگہ پر حارث سہیل کو ٹیم میں شامل کر لیا گیا تھا۔عمر اکمل نے انسٹا گرام پر اپنے ایک پیغام میں کہا کہ انہوں نے ایک فٹنس ٹیسٹ دیا ہے اور وہ مزید فٹنس حاصل کر رہے ہیں۔