لاہور ( این این آئی) ورلڈ الیون کی لاہور آمد کے موقع پر قذافی سٹیڈیم کے گرد دکانوں اور ریسٹورنٹس کو چھ روز کے لیے بند رکھنے کا فیصلہ کرلیا گیا ، پی سی بی نے سکیورٹی کے حوالے سے منصوبے کی کاغذی کارروائی مکمل کرلی۔ تفصیلات کے مطابق ورلڈ الیون نے گیارہ سے سولا ستمبر تک لاہور کا دورہ کرنا ہے،12، 13اور 15ستمبر کو تین ٹی ٹونٹی میچز قذافی سٹیڈیم میں کھیلے جائیں گے۔

ذرائع کے مطابق ورلڈ الیون کی آمد کے پیش نظر قذافی سٹیڈیم کو ہائی الرٹ ایریا بنا دیا جائے گا ، قانون نافذکرنے والے ادارے اور سیکورٹی فورسز کے جوان قذافی سٹیڈیم سمیت پورے نشتر پارک سپورٹس کمپلیکس کا انتظام سنبھال لیں گے۔اس حوالے سے قذافی سٹیڈیم کے گرد دکانوں اور ریسٹورنٹس کو چھ روز کے لیے بند رکھنے کا فیصلہ کیا گیا ہے ، پی سی بی نے سکیورٹی کے حوالے سے منصوبے کی کاغذی کارروائی مکمل کرلی۔ ذرائع کے مطابق قانون نافذ کرنے والے اداروں نے سٹیڈیم کے گرد تمام ریسٹورنٹس اور دکانوں کو نئے ملازمین رکھنے سے بھی منع کردیا ہے ۔