لاہور( این این آئی) ورلڈ الیون کے دورہ پاکستان کی تیاریاں عروج پر پہنچ گئیں ،قذافی اسٹیڈیم میں پچز کی تیاری اور تمام انکلوژرز کی تزئین و آرائش کا کام جاری ہے ، ٹکٹ کی قیمت 500سے 6ہزار تک رکھے جانے کا امکان ہے ۔تفصیلات کے مطابق ورلڈ الیون کے دورہ پاکستان کی مناسبت سے پاکستان کرکٹ بورڈ کی جانب سے تیاریاں شروع کر دی گئی ہیں۔ قذافی اسٹیڈیم میں گھاس کی کٹائی کیساتھ ماہرین نے پچز کی تیاری بھی شروع کر دی ہے ۔

تمام انکلوژرز میں کرسیاں کو چیک کیا جارہا ہے اور ٹوٹی ہوئی کرسیوں کو نئی کرسیوں سے تبدیل کیا جارہا ہے اس کے ساتھ ساتھ رنگ و روغن کا کام بھی جاری ہے ۔پاکستان اور ورلڈ الیون کے تین ٹی ٹونٹی 12، 13اور 15ستمبر کو شیڈول ہیں ۔ ٹکٹوں کے نرخ کی سمری بھی چیئرمین پی سی بی نجم سیٹھی کو بھجوا دی گئی ۔ میچز کی ٹکٹ 500سے 6ہزار روپے تک رکھے جانے کا امکان ہے ۔