لندن(آئی این پی) اظہر علی بھارت کیخلاف فائنل میں بھی ٹیم کو اچھا آغاز فراہم کرنے کیلیے پرعزم ہیں۔ایک خلیجی اخبار کو انٹرویو میں اظہر علی نے کہاکہ چیمپئنز ٹرافی کے پہلے ہی میچ میں بھارت کے ہاتھوں شکست نے حوصلے پست کیے لیکن کپتان اور مینجمنٹ نے کھلاڑیوں کو مایوسی سے نکالنے میں اہم کردار ادا کیا، گرین شرٹس ایک نئے عزم کے ساتھ میدان میں اترے اور عالمی نمبر ون جنوبی افریقہ کو زیر کرلیا،
اس کامیابی نے ہمارا اعتماد بحال کیا،ٹیم نے ارادہ کیا کہ حریف کوئی بھی ہو آسانی سے ہتھیار نہیں ڈالیں گے۔سابق کپتان اظہر علی نے کہا کہ سری لنکا کیخلاف سرفراز احمد اور محمد عامر نے فتح چھین کر حوصلے مزید بلند کردیے، سیمی فائنل میں انگلینڈ کی مضبوط بیٹنگ لائن کو دبا ؤمیں لانے کی پالیسی کامیاب رہی۔ بعد ازاں ہدف کا تعاقب کرتے ہوئے اچھے آغاز کی ضرورت تھی،فخرزمان کی جارحانہ بیٹنگ نے میرا کام بھی آسان کردیا، تمام بولرز اوپنر کو رنز بنانے سے روکنے کی کوشش کرتے ہیں جس کے نتیجے میں مجھے اسٹرائیک کا موقع ملتا رہتا ہے۔اظہر علی نے کہا کہ پاکستان ٹیم نے ثابت کیاکہ وہ کسی بھی مرحلے پر کم بیک کرسکتی ہے،اب ٹائٹل سے ایک قدم کی دوری پر ہیں،ایک بار پھر روایتی حریف کا سامنا ہے، فخرزمان کے ساتھ ٹیم کو اچھا آغاز فراہم کرنے کی کوشش کروں گا، روایتی حریف کو زیر کرنے کیلیے تینوں شعبوں میں بہتری کارکردگی کا مظاہرہ کرنا ہوگا، انہوں نے کہا کہ بھارتی بیٹنگ لائن خاصی مضبوط لیکن پاکستانی بولرز بھی بھرپور فارم میں ہیں، فیلڈنگ بھی اچھی جارہی ہے، پہلے میچ کی کارکردگی کا خوف ذہن پر سوارکرنے کے بجائے ٹائٹل پر قبضہ جمانے کیلیے سخت محنت کریں گے۔
