اسلام آباد (این این آئی)اسلام آباد یونائیٹڈ کے کوچ ڈین جونز نے رومان رئیس کی تعریف کرتے ہوئے کہا کہ فاسٹ باؤلر کو مزید مواقع ملنے چاہئیں کیونکہ ہمیں یہ نہیں بھولنا چاہیے کہ پی ایس ایل میں دباؤ کی صورتحال میں رومان سب سے بہترین باؤلر ثابت ہوا تھا۔ڈین جونز نے کہا کہ میں نے اپنی پوری زندگی میں ایسا باؤلر نہیں دیکھا جو بلے باز کی جانب سے خود پر ااٹیک کرنے پر لطف اندوز ہوتا ہو اور وہ ایک مختلف طرز کا باؤلر ہے۔
انہوں نے کہا کہ رومان 140 کلو میٹر فی گھنٹہ تک کی رفتار کے ساتھ گیند کرنے کے ساتھ ساتھ موجودہ دور کی کرکٹ میں اپنی ورائٹی سے بلے باز کو پریشان کر سکتا ہے کیونکہ وہ ایک ذہین باؤلر ہے اور ون ڈے و ٹی20 دونوں میں اس سے یکساں فائدہ اٹھایا جانا چاہیے۔قومی ٹیم کے نوجوان فاسٹ باؤلر رومان رئیس نے پاکستان سپر لیگ کے انعقاد پر پاکستان کرکٹ بورڈ کا شکریہ ادا کرتے ہوئے اس ایونٹ کو نوجوان کھلاڑیوں کیلئے بہترین پلیٹ فارم قرار دیا ہے۔ایک انٹرویو میں رومان رئیس نے کہا کہ پی ایس ایل مجھے جیسے نوجوان کھلاڑیوں کیلئے بہترین پلیٹ فارم ہے ٗ میں نے اسلام آباد یونائیٹڈ کیلئے اچھی کارکردگی کا مظاہرہ کیا جس کی بدولت میں پاکستانی ٹیم میں منتخب ہوا۔ انہوں نے ابھرتے ہوئے نوجوان اسپنر شاداب خان کی مثال دیتے ہوئے کہا کہ پی ایس ایل نے لیگ اسپنر کو بھی اپنے صلاحیتوں کے اظہار کا موقع فراہم کی اور یہ ایونٹ نوجوانوں کو گمنامی کے اندھیروں میں کھونے کے بجائے ایک بہترین پلیٹ فارم فراہم کر رہا ہے۔سرفراز احمد کی قیادت کے حوالے سے سوال پر فاسٹ باؤلر نے کہا کہ میں سرفراز کے ساتھ کھیلتے ہوئے بڑا ہوا ہوں، وہ سوچ سمجھ کر قیادت کر تے ہیں جو بحیثیت باؤلر میرے بہت مثبت چیز ہے ٗوہ جانتے ہیں کہ میری خوبیوں سے واقف ہیں لہٰذا وہ دباؤ کی صورتحال میں میرا استعمال کرسکتے ہیں۔رومان نے کہا کہ ڈومیسٹک سطح پر سرفراز انتہائی
کامیہاب قائد ثابت ہوئے ہیں اور امید ظاہر کی کہ وہ انٹرنیشنل کرکٹ میں بھی ان کامیابیوں کا سلسلہ جاری رکھیں گے۔انہوں نے کہا کہ کوچ مکی آرتھر بہترین فٹنس کے حامل کرکٹرز کے ساتھ اٹیکنگ اور جارحانہ کرکٹ کھیلنے پر یقین رکھتے ہیں اور اسلام آباد یونائیٹڈ کی جانب سے کیلنے کی وجہ سے میں اس طرز کی کرکٹ کھیلنے کا عادی ہوں۔
