دبئی (آئی این پی)پاکستان سپر لیگ میں کراچی کنگز کے کپتان کمار سنگاکارا نے کہا ہے کہ جو کچھ ہونا تھا وہ ہوچکا اور اب یہ وقت تمام تر توجہ کھیل پر مرکوز کرنے اور اچھی کارکردگی دکھانے کا ہے۔ میڈیا سے گفتگو کرتے ہوئے کمار سنگاکارا کا کہنا ہے کہ ہمیں خوشی اور اطمینان ہے کہ ہماری ٹیم کا کھلاڑی کلیئر ہوگیا جس کے بعد پوری ٹیم نے شاہ زیب حسن کو میدان میں بھرپور حوصلہ دیا اور وہ کوئٹہ گلیڈی ایٹرز کے خلاف میچ کھیلے۔ وہ اچھی بیٹنگ کررہے تھے لیکن بدقسمتی سے 19 رنز بنانے کے بعد آؤٹ ہوگئے لیکن وہ ذہنی

طور پر بالکل تیار دکھائی دے رہے تھے حالانکہ وہ وقت ان کے لیے پریشان کن تھا۔کمار سنگاکارا نے اس پورے معاملے کو صحیح طریقے سے نمٹائے جانے پر پاکستان کرکٹ بورڈ کے حکام کی تعریف کی اور کہا کہ ‘پروفیشنل کھلاڑیوں کی حیثیت سے ہم سب کی یہ ذمہ داری بنتی ہے کہ ہم اس کھیل کی عزت کریں اور کسی بھی قسم کی کرپشن کو اس کھیل میں نہ آنے دیں۔سنگاکارا نے اپنی ٹیم کی دو میچوں میں شکست پر تبصرہ کرتے ہوئے کہا کہ ہمیں اگلے میچوں میں سخت محنت کرنا ہوگی۔