برسبین (آن لائن)باؤلنگ ایکشن کلیئر ہونے کے بعد ایک عرصے کے وقفے کے بعد قومی ٹیم میں واپس آنے والے محمد حفیظ نے گابا کرکٹ گراؤنڈ میں منفرد اعزاز اپنے نام کر لیا۔پاکستان اور آسٹریلیا کے درمیان برسبین میں کھیلے جا رہے سیریز کے پہلے ایک روزہ میچ میں پاکستان کی جانب سے محمد عامر نے باؤلنگ کا آغاز کیا تو دوسرے اینڈ سے محم حفیظ نے ان کا ساتھ نبھایا۔اس کے ساتھ ہی برسبین کرکٹ گراؤنڈ پر باؤلنگ کا آغاز کرنے والے پہلے اسپنر بن گئے ہیں اور آج سے قبل کسی بھی اسپنر نے اس میدان پر باؤلنگ میں اٹیک کرنے کا اعزاز حاصل نہیں کیا۔
یاد رہے کہ محمد حفیظ آئی سی سی کی جانب سے عائد کردہ ایک سالہ پابندی کے بعد پہلی مرتبہ عالمی سطح پر باؤلنگ کر رہے تھے۔2014 میں پہلی مرتبہ ایکشن رپورٹ ہونے کے بعد حفیظ پر باؤلنگ نہ کرنے کی پابندی لگی لیکن پھر ایکشن پر کام کر کے انہوں نے اس پابندی کا خاتمہ کرا لیا۔تاہم جلد ہی ان کا ایکشن دوبارہ رپورٹ پوا جس کے سبب ان پر دوبارہ پابندی عائد کردی گئی جس کا رواں سال جولائی میں خاتمہ ہوا جس کے بعد حفیظ نے انجری سے نجات حاصل کی اور ایکشن کلیئر کرا لیا۔حفیظ کو ابتدائی طور پر پاکستانی کے اسکواڈ کا حصہ نہیں بنایا گیا تھا لیکن ٹیم مینجمنٹ کی درخواست پر حفیظ کو بعد میں پاکستان کے اسکواڈ میں شامل کر لیا گیا۔

موضوعات:کھلاڑی کھیل محمد حفیظ